«Omıkron» shtamymen sáıkes keletini kórsetilgen
Soltústik Koreıa elde koronavırýstyń alǵashqy jaǵdaıy tirkelgenin málim etti, dep habarlaıdy Almaty-akshamy.kz QazAqparat-qa silteme jasap.
Buǵan deıin Koreı Halyq Demokratıalyq Respýblıkasynyń bıligi pandemıa bastalǵaly elde koronavırýs ınfeksıasyn juqtyrýdyń birde-bir jaǵdaıy tirkelmegenin málimdep kelgen bolatyn. Phenánda jeksenbi kúni pasıentterden alynǵan synama koronavırýstyń «omıkron» shtamymen sáıkes keletinin kórsetken. İndetpen baılanysty eldegi «asa kúrdeli tótenshe jaǵdaıdy» talqylaý úshin Phenánda prezıdent Kım Chen Ynniń qatysýymen saıası búro otyrysy ótti. Otyrys barysynda Kım Chen Yn «kútpegen daǵdarysty» eńserýge ýáde etip, barlyq sheneýnikke vırýstyń taralýyna yqpal etýi múmkin barlyq joldardy buǵattaýdy tapsyrdy. Sondaı-aq ol shekara boıynda, sonyń ishinde teńizde jáne áýede qyraǵylyqty kúsheıtýdi júktedi. Atap ótilgendeı, mundaǵy maqsat – eldi basqarýda turaqtylyqty qamtamasyz etý, vırýstyń taralýyn aýyzdyqtaý, sondaı-aq «indet oshaǵyn qysqa ýaqytta joıý úshin» anyqtalǵan naýqastardy emdeý.