Elimizdiń barlyq óńirlerinen kelgen 400-ge jýyq sarbaz jas jaýynger kýrsynan ótip Otanyna adal bolýǵa saltanatty túrde ant berdi jáne Otannyń tolyqqandy qorǵaýshylarymen bir qatarǵa turdy.
Osy saltanatty is-sharamen jas ulandyqtardy 6506 áskerı bóliminiń komandıri polkovnık Marat Rahmanov quttyqtady, dep habarlaıdy aqshamnews.kz QR İİM Ulttyq ulany «Ońtústik» óńirlik qolbasshylyǵynyń baspasóz qyzmetine silteme jasap.
- «Sarbaz myrzalar! Sizder Otanǵa adal bolýǵa áskerı ant berdińizder. Sizderdiń árqaısylaryńyz bul kúndi ómir boıy este saqtaısyz dep úmittenemin jáne árqashan Otanǵa abyroımen qyzmet atqarasyzdar dep oılaımyn. Sizderdi áskerı ant qabyldaǵandaryńyzben, al quqyqtyq tártip áskerlerin jańa tolyqtyrýmen quttyqtaımyn. Sizderge jáne Sizderdiń otbasylaryńyzǵa, barsha halqymyzǵa, barsha memleketimizge tabys, densaýlyq, beıbitshilik pen amandyq tileımin», - dedi Marat Oraluly.
Áskerı ant - bul memleketke, óz eliniń halqyna adal bolýǵa ant berý. Áskerı ant berý «áskerı qyzmet jáne áskerı qyzmetshilerdiń mártebesi týraly» Qazaqstan Respýblıkasynyń Zańymen jáne ishki qyzmet jarǵysymen reglamentteledi. Bul áskerı istiń jolyna túsý kezinde adam kezdesetin alǵashqy mańyzdy áskerı qyzmet aktileriniń biri.
Áskerge shaqyrylýshylardy osy mańyzdy oqıǵamen quttyqtaýǵa jaýyngerlerdiń ata-analary, jaqyn týystary men áskerı bólimniń ardagerleri keldi.
Jas sarbazdardyń biri qatardaǵy jaýynger Aıtmahanbek Álibaı Astana qalasynan shaqyryldy. Ol búgin óz qyzmettesteriniń aldynda sóz sóıleý qurmetine ıe boldy.
- «Biz ózimiz qabyldaǵan áskerı antqa adal bolamyz jáne Shymkent qalasynda qaýipsizdikti qamtamasyz etý úshin bar kúshimizdi salamyz. Biz aldymyzǵa qoıylǵan barlyq mindetterdi tolyq kólemde oryndaımyz jáne memlekettiń qaýipsizdik isine óz úlesimizdi qosamyz», - dedi jas ant berýshi.
Áskerı bólimniń ardageri zapastaǵy podpolkovnık Sultan Nurymbetov áskerge shaqyrylýshylarǵa óz tilekterin joldady. Ol bizdiń elimizde áskerı boryshyn oryndaý, otbasyn, Otanyn qorǵaý árbir er adamnyń qasıetti mindeti bolǵanyna jáne bolatynyna senim bildirdi.
- «Armıa - bul jas jigitke kóp nárse beretin shynaıy ómir mektebi. Qyzmet etken jyldar Sizderdiń minezderińizdi shyńdaıtynyna kúmánim joq», - dedi Sultan Janabaıuly.
İs-shara sońynda jas ulandyqtar saltanatty sappen, áskerı orkestrdiń daýysyna qadam basyp, komandırleri men ata-analarynyń aldynda saltanatty sherýmen ótti.
Ant bergen áskerı qyzmetshiler jaqyn arada Shymkent jáne Túrkistan qalalarynyń kóshelerinde qoǵamdyq tártip pen qaýipsizdikti qamtamasyz etý boıynsha mindetterdi oryndaýǵa kirisetinin atap ótken jón.