Almaty qalasyndaǵy №224 mektepte ata-analardyń psıhologıalyq mádenıetin arttyrýǵa baǵyttalǵan erekshe is-shara ótti. Jıynǵa mektep ákimshiligi, pedagogter men ata-analar qatysty.
Art-praktıkýmnyń negizgi maqsaty – ata-ana men mektep arasyndaǵy ózara seriktestikti nyǵaıtý, otbasylyq qarym-qatynasty jaqsartý jáne emosıonaldyq densaýlyqty qoldaý. Sondaı-aq ata-analardyń psıhologıalyq saýattylyǵyn arttyrý, ózin-ózi taný men kúızelisti basqarý ádisterin meńgertý kózdeldi.
– Art-praktıkým shyǵarmashylyq is-sharasyna ata-analar keńesiniń músheleri qatysyp otyr. Mektebimiz jańadan ashylǵandyqtan, oqýshylarymyz, ustazdarymyz ben ata-analaramyzdy bir-birimen jaqynyraq tanystyrý maqsatynda bas qosyp otyrmyz. Bolashaqta bárimiz birige otyryp, mekteptiń mártebesin kóterý baǵytynda jumys isteımiz. Basty mindet «Ustaz – oqýshy – ata-ana úshtigin» qurý, – dedi mektep dırektory Raıza Ahmetova.
Shara baǵdarlamasy úsh negizgi baǵytty qamtydy. Psıhologıalyq trenıńte mekteptiń psıholog mamandary ata-analarǵa kóńil kúıdi basqarý, ishki kúıdi retteý jáne ózara túsinistikke jetý joldaryn túsindirip, tıimdi komýnıkasıa daǵdylaryn damytýǵa arnalǵan jattyǵýlar júrgizdi. Trenıń barysynda qatysýshylar túrli ómirlik jaǵdaıattardy talqylap, balamen sóılesýdiń jańa tásilderin meńgerdi.
ART terapıa baǵytynda kásibı mamandar art-terapıa ádisterin qoldana otyryp, shyǵarmashylyq arqyly ishki sezimderdi beıneleý múmkindigin qoldana aldy. Ata-analar boıaý, kollaj, sımvoldyq sýret salý sekildi tásildermen óz kóńil kúıin erkin jetkizdi.
İs-shara sońynda mektep oqýshylary men muǵalimderiniń daıyndaǵan óneri kórermen nazaryna usynyldy. Konsert ata-analardyń kóńil-kúıin kóterip, jıynda jyly atmosfera ornatty.
Art-praktıkýmǵa qatysqan ata-ana Laýra Janatqyzy júrgizilgen formattyń óte mańyzdy ekenin atap ótti. Aıtýynsha, mundaı shyǵarmashylyq jattyǵýlar olardyń óz sezimderin túsinip, balalarynyń emosıonaldyq damýyn qoldaýǵa múmkindik beredi. Al trenıńte úırengen jattyǵýlary otbasyndaǵy qarym-qatynasty jaqsartýǵa baǵyttalǵanyn jasyrmady.
– Bul mektepte qyzdarym bilim alady. İs-sharaǵa qatysqanyma qýanyshtymyn. Balaǵa bilimmen qatar tárbıeni de berý asa mańyzdy. Art-praktıkým – mektep pen ata-ana arasyndaǵy yntymaqtastyqty jańa deńgeıge kóteretin, bir-birin túsinýge jáne qoldaýǵa baǵyttalǵan mańyzdy bastama, – dedi ata-ana.
Atalǵan bilim ordasy bul jobasy arqyly ata-analardyń psıhologıalyq mádenıetin arttyryp, otbasylyq qundylyqtardyń mańyzyn uǵyndyrdy ári bilim berý prosesine jaqsy jaǵynan áser etetinin kórsetti.