Qazaqstan mádenıetiniń kókjıegin keńeıtip, el abyroıyn asqaqtatyp júrgen óner ıeleri álemdik sahnada laıyq baǵasyn alyp júr. Aqshamnews.kz shetelden marapat pen ataq alǵan tanymal qazaqstandyq tulǵalarǵa sholý jasady.
Dımash Qudaıbergen
Keshe ǵana otandasymyz, álemge áıgili ánshi Dımash Qudaıbergen Qyrǵyz Respýblıkasynyń "Halyq ártisi" ataǵyn ıelendi. Bul týraly 22 shildede "Meıkın Azıa" festıvaliniń jabylý saltanatynda aıtyldy. Tıisti jarlyqqa Qyrǵyz Respýblıkasynyń prezıdenti Sadyr Japarov qol qoıdy. Syılyqty Memlekettik hatshy Marat Imanqulov tabys etti.
Roza Rymbaeva
Byltyr sáýirde Roza Qýanyshqyzy Rymbaeva "Qyrǵyz Respýblıkasynyń halyq ártisi" atandy.
19 sáýirde Qyrǵyzstannyń Memlekettik hatshysy Súıinbek Qasmambetov mádenıet jáne óner ókilderin memlekettik nagradalarmen marapattaý ǵasyrlarǵa ulasqan dostyqtyń, ortaq mádenıettiń, damyp kele jatqan yntymaqtastyqtyń belgisi ekenin atap ótti.
"1996 jyly maǵan Qyrǵyzstannyń eńbek sińirgen mádenıet qaıratkeri ataǵy berildi. 28 jyldan keıin "Qyrǵyz Respýblıkasynyń halyq ártisi" qurmetti ataǵyn alyp otyrmyn. Bul men úshin úlken jetistik", - degen edi ol.
Altynbek Qorazbaev
"Qyrǵyz Respýblıkasynyń Halyq ártisi" qurmetti ataǵy qazaqstandyq belgili kompozıtor Altynbek Qorazbaevqa da tabys etildi.
1973 jyldan Jambyl oblystyq "Alataý" estradalyq ansambliniń kórkemdik jetekshisi, sonan soń oblystyq fılarmonıa dırektory bolyp istedi. Halyq súıip tyńdaıtyn "Qara kempir", "Qara shal", "Shashbaýlym", "Syrǵalym", "Aıaýly Tarazym", "Ata", "Saǵyndym atamdy" ánderiniń avtory.
Jeńisbek Pıazov
Ózbekstan Respýblıkasy táýelsizdiginiń 30 jyldyǵyna oraı keshe Ózbekstan Respýblıkasy Prezıdentiniń bir top óner, mádenıet, sport jáne qoǵam qaıratkerlerin memlekettik ataqtarmen marapattaý týraly Jarlyǵy shyqty. Solardyń arasynda etnıkalyq qazaq, áıgili opera ánshisi Jeńisbek Pıazov "Ózbekstan halyq ártisi" ataǵyn aldy.
Reper Imanbek
2021 jyly Imanbek Zeıkenov (Imanbek) reper Saint JHN-tiń Roses kompozısıasyna jasaǵan remıksi úshin Grammy syılyǵyn jeńip alǵan edi.
Grammy - Amerıkalyq dybys jazý akademıasynyń premıasy, AQSH dybys jazý qaýymdastyǵymen 14 naýryzda 1958 jyly qurylǵan bolatyn. Búgingi kúni mýzyka ındýstrıasynda eń abyroıly marapat jáne kıno ındýstrıasynda tek "Oskarmen" teńesedi.
