Kospleı ónerí jaıly estíp pe edíńíz? Būl - belgílí bír keıípkerdíń beınesíne eníp, onyń syrt kelbetín, kostyumín, típtí mínez-qūlqyn dálme-dál jetkízetín óner túrí. Álemde keńínen taralǵan būl hobbı qazír elímízde de qanat jaıyp keledí. Al jaqynda ǵana halyqaralyq Comic Con Astana-2025 festıvalínde qazaqstandyq kospleı model Emılıya Trotsenko gran-prı jeńíp alyp, kópshílíktíń nazaryn audardy. Ol Dota 2 oıynynyń keıípkerí Naga Siren obrazyn erekshe sheberlíkpen somdap, qazylar alqasyn tántí ettí. Erekshe óner ıesíníń shyǵarmashylyq joly qalaı bastaldy? Aqshamnews.kz tílshísí keıípkermen sūhbattasty.
curet: instagram.com/grafomanka
Emılıya - Oral qalasynyń tumasy. Keıíngí segíz jyldan berí Astanada tūrady. Ol el astanasynan ózíníń jan qalauyn, shyǵarmashylyq tynyshtyǵyn tapqan. Jasy - 34-te. Negízgí kásíbí - barberıng. Būl salada 9 jyldyq tájírıbesí bar. Alaıda keıíngí ekí jarym jyl íshínde ol jańa baǵytqa - psıhologıyaǵa bet būrǵan. Qazír Máskeu psıhoanalız ınstıtutynda "klınıkalyq psıhologıya" mamandyǵy boıynsha magıstraturada oqyp júr jáne geshtalt-terapevt boluǵa daıyndalyp jatyr. Al kospleı modelí bolu - onyń shyǵarmashylyq hobbıí.
Kospleı álemíne alǵashqy qadam
Emılıyanyń kospleıge degen qyzyǵushylyǵy 2014 jyly Oral qalasynda bastalǵan. Ol kezde "Hobbıt" fılmíníń premerasyna elfter keıpínde qatysu ıdeyasymen "Saqınalar ámírshísí" fandomy atynan qatysqan. Būl onyń alǵashqy kospleı tájírıbesí boldy.
"Sol kezden bastap túrlí tanymal keıípkerlerdíń beınesín jasauǵa áuestene bastadym. Otbasym hobııíme únemí qoldaularyn bíldíredí. Ásírese alǵashqy obrazdarymdy jasauǵa anam kóp kómektestí", - deıdí Emılıya.
curet: instagram.com/grafomanka
"Japon estetıkasynan shabyt alamyn"
"Comic Con Astana" festıvalí - jyl saıyn ótetín gık-mádenıet ís sharasy. Halyqaralyq festıvalde túrlí mádenıet ókílderí bas qosyp, baıqaularǵa qatysyp, baq synaıdy. Emılıya "Comic Con Astana" festıvalíne 2019 jyldan berí qatysyp keledí. Sol jyldan berí alǵash ret bıyl ǵana júldeger atanyp otyr.
"Pandemıya kezínde úzílís bolǵanymen, 2023 jyldan bastap qaıtadan belsendí qatysa bastadym. 2023 jáne 2024 jyldary fınalǵa shyqsam da, júldege ílíkpedím. Al bıyl baıqauǵa Naga Siren keıípkerín tańdauyma Dota 2 oıynyna degen súıíspenshílígím sebep boldy. Men japon estetıkasynan shabyt alamyn. Sondyqtan būl obrazben jūmys ísteu men úshín úlken lázzat syılady", - deıdí ol.
curette: Emılıyanyń baıqaudaǵy Naga Siren obrazy
Emılıya būl obrazdy jasauǵa tórt aı uaqytyn jūmsaǵan. Ár detalǵa jítí mán bergen. Qalyptaryn qajettí materıaldardan qūıyp, boyap, janyn salǵan. Ol obrazdy daıyndauǵa jígítí kómekteskenín aıtty.
"Obrazdan bólek sahnalyq qoıylymdy oılastyru da bíraz eńbektí talap ettí. Nómír ıdeyasy Rammstein tobynyń "Sonne" ánín tyńdap otyrǵan kezde oıda kenetten paıda boldy. Būl án meníń súıíktí shyǵarmalarymnyń bírí. Sırena beınesínde vokal partıyasyn jetkízgím keldí. Kostyumníń borttaryn jasau kútpegen jerden qıynǵa soqty. Olardy art-referensterden shynaıy kóríníske aınaldyru ońaı bolmady, ásírese arqadaǵy bantıktíń jıegí qıyn boldy. Sonymen qatar, būl meníń alǵash jasaǵan karkas negízíndegí parıgím. Men osy jūmystyń nátıjesímen erekshe maqtanamyn", -dedí óner ıesí.
"Júldelí bolatynyma senímdí boldym"
Emılıya baıqaudan qūr qol qaıtpaıtynyna senímdí bolǵan. Alaıda bas júldení jeńgende abdyrap qalǵanyn jasyrmady.
"Ózge qatysushylardyń deńgeıí óte joǵary boldy. Ár kostyumde orasan zor eńbek jatqany kóríníp tūrdy. Shynymdy aıtsam, baıqaudan bír nomınatsıya nemese ekínshí/úshínshí oryn aluǵa úmíttendím. Al bas júldení jeńemín dep múlde oılamadym. Meníń esímím atalǵanda, baqyttan kózíme jas kelíp, sahnaǵa díríldegen ayaqpen áreń shyqtym. Eńbegímníń elengeníne quanyshty boldym", - deıdí Emılıya.
curet: instagram.com/grafomanka
Kospleıshíníń endígí armany...
Emılıya Trotsenko endí el atynan Germanıyada ótetín halyqaralyq kospleıshíler baıqauyna qatysyp, Qazaqstannyń da jańa baǵyttaǵy óner keńístígínen habardar ekenín kórsetíp, júldelí oryn alu ekenín aıtty. Ol atalmysh baıqauǵa demeushí ízdep jatqanyn da jasyrmady.
"Qazír meníń basty maqsatym - bıyl Gamburg qalasynda ótetín The International ayasyndaǵy halyqaralyq kospleı baıqauyna qatysu úshín demeushí tabu. Qazaqstan atynan osyndaı auqymdy sharaǵa alǵash ret qatysatyn kospleıshí bolǵym keledí. Būl - meníń armanym jáne men ony júzege asyruǵa tolyq daıynmyn!", - deıdí ol.
Aıta keteıík, kospleı ónerí -1980-jyldary Japonıyada qarqyndy damyp, búgínde álem boıynsha kásíbı shyǵarmashylyq baǵytqa aınalǵan. Qazaqstanda kospleı 2000-jyldardyń ortasynda paıda bolyp, 2010 jyldan berí túrlí fan-festıvalder men baıqaular arqyly keń tarala bastady. Keıíngí jyldary Comic Con Astana sekíldí írí sharalar kospleı ónerín jańa deńgeıge shyǵaryp otyr. Qazaq kospleıshílerí álemdík sahnaǵa shyǵuǵa daıyn ekenín Emılıya sekíldí talanttar dáleldep keledí.