Almatydaǵy №2 Balalar qalalyq klınıkalyq aýrýhanasynda reseılik mamandardyń qatysýymen úsh kúndik sheberlik saǵaty ótti.
İs-shara barysynda belgili ortoped-travmatolog Georgıı Chıbırov pen Orhan Gatamov №2 BQKA dárigerlerimen birlesip, aýyr neıroortopedıalyq kemistikterge shaldyqqan qazaqstandyq 4 balaǵa biregeı ota jasady, dep habarlaıdy aqshamnews.kz.
Joǵary tehnologıalyq medısınalyq kómek MÁMS qarajaty esebinen jasaldy.
«Bizdiń klınıkada bir mezette kóp deńgeıli ota jasaý tájirıbesi belsendi túrde qoldanylady. Kóp deńgeıli operasıa barysynda anestezıa da bir ret qoldanylady, bizdiń mamandar birneshe manıpýlásıany kezeń-kezeńmen júzege asyra alady. Al mundaı otalardy ortopedıa salasynda jınaqtaǵan tájirıbesi mol reseılik áriptestermen birlesip jasaý pasıentterge kórsetilgen hırýrgıalyq kómektiń nátıjesin eselendire túsetini haq. Onyń ústine, únemi ózara tájirıbe almasýdyń syrqattardy emdeýde atqarar róli de zor», - dep atap ótti №2 BQKA dırektory Marat Rabandıarov.
Sheberlik sabaǵy barysynda naýqastar konsýltasıa aldy, dárigerler balalardyń serebraldy sal aýrýyna shaldyqqan syrqattarǵa operatıvtik em jasaýdyń qosymsha tehnıkalaryn meńgerdi. Barlyǵy túrli medısına uıymdarynda eńbek etetin 16 maman biliktiligin arttyryp, tájirıbe almasýǵa múmkindik aldy.
№2 BQKA travmatolog-ortopedi Uljan Soltanbekovanyń aıtýynsha, neıroortopedıalyq kemistikke, ásirese serebraldy sal aýrýyna shaldyqqan balalarǵa kóp deńgeıli ota jasaý qıyn, degenmen óte qajet. Sebebi aıaq-qol kemistigi tize býyny, jilinshik, jambas, taban t.b. organdardyń qyzmetin buzady. SEMLS ádisi serebraldy sal aýrýymen aýyratyn balalarǵa bir mezette birneshe ota jasap, aıaq-qol kemistigin retteýge múmkindik beredi. Bul operasıalar pasıentterdiń ómir sapasyn jaqsartýǵa, aýyrsynýdy tómendetýge, qımyl-qozǵalys apparatyndaǵy kemistikter men balanyń júrisin túzetip, jaqsartýǵa, kemistik saldaryn azaıtýǵa baǵyttalǵan ári otadan keıingi qalypqa kelý merzimin de qysqartady.
Nevrologıalyq derttermen aýyratyn balalardy dárigerge der shaǵynda qaratý óte mańyzdy, olar nevrologtardyń turaqty baqylaýynda bolyp, taǵaıyndalǵan em men ortopedıalyq qurylǵylardy belsendi túrde paıdalanýy tıis, deıdi mamandar.