Kez kelgen adamnyń abyroıǵa eńbekpen jetetini belgili. Bul arada másele mansabynyń joǵary bolǵanynda emes, etken eńbeginiń adaldyǵynda. Sodan da bolar, avtokólikke qajetti qosalqy bólshekter satatyn bazardyń satýshylary da, satyp alýshylar da Gúlshatty tegis tanıdy. Anadaıdan aldymen arbasy, sosyn ózi kórinetin sháı satatyn kelinshekti turaqty klıentteri kútip alyp, shyǵaryp salyp jatady. Sonda osy Gúlshat degen kim edi deısiz ǵoı.
Ol bazardyń basshysy nemese esepshisi, tipti tolyp jatqan laýazymdy qyzmettiń biriniń de ıesi emes. Bar bolǵany tańnan keshke deıin sháı satyp, nápaqasyn aıyryp júrgen kóp qazaq áıelderiniń biri. Gúlshattyń kerek deseńiz, alyp bazarda belin jazyp, demalyp otyratyn orny da joq. Jaz boıy bazardaǵylar Gúlshattyń sháıimen shólin bassa, qysta boıyn jylytady. Eńbekqor kelinshek úlken arbasyn toltyryp alyp, búkil bazardy aralap shyǵam degenshe, tús aýyp, kesh batady. Osylaısha tóńiregindegilerdiń alǵysyna bólenip júrgen eńbekqor Gúlshatqa kórsetiletin qurmet bazar basshysynan artyq bolmasa, esh kem emes.
Gúlshattyń otbasy osydan úsh-tórt jyl buryn aýyldan qalaǵa kóship kelgen edi. Birden munda ornyǵyp, úırenisip ketý de ońaıǵa túspedi. Ásirese, baspana tabý máselesi qıynnyń-qıyny eken. Jekemenshik úılerdi jaǵalap, páter izdegen kúnderin qalaı umytsyn? Úsh balasynyń bar ekenin kórgende úı ıeleri birden bastaryn shaıqap, jolatqylary kelmeıdi. Osy bazardyń mańaıyna túnep qalǵan da kezderi bolǵan. Ondaıda balalarynyń «aýylǵa qaıtaıyqshy, bizge qala kerek emes» dep talaı jylaǵany esinde. Kim oılaǵan úlken qaladan páter taýyp, qonystanýdyń ońaıǵa túspeıtinin. Aqyrynda, bir kishkentaı buryshty tapty-aý. Bularǵa úı ıesimen turatyn eski úıdiń bir bólmesi buıyrdy.
Kóp uzamaı Gúlshat bazarǵa shyǵyp, sháı satýdy kásipke aınaldyrsa, kúıeýi Nurlan dóńgelek aýystyrýshynyń kómekshisi bolyp shyǵa keldi. Buryn bazarda ony-muny satyp júrgenderdi kórgende ishteı «osydan birdeńe túser deımisiń» deýshi edi. Qarap otyrsa, tıynnan teńge quralady eken. Alǵashqy kúni-aq ájepteýir tıyn-teben jasap, saýdanyń dámin aldy. Túsken aqshaǵa kóterme saýda bazaryna baryp, eki qorap sháı, qoıý sút, kofe, bir rettik plasmassa ydystar, qasyq, sýlyq sıaqty qajetti maılyqtardy satyp aldy. Úıdegi balaqaılaryna tátti-pátti alýdy da umytqan joq. Osylaısha aıy ońynan týyp, sharýasy dóńgelene bastaǵan tusta úı ıesiniń «úıdi bosatyńdar, baspanamdy satam» degeni bar emes pe? Shaharly jerde týysy túgil, tanysy joq jas otbasynyń basyna bult úıirildi. Kimge baryp kómek surasyn. Aınalasy úsh aıdyń ishinde bul baspanaǵa da úırenip qalypty. «Jazǵan qulda sharshaý joq» demekshi, aqyry týǵan úıinen ketip bara jatqandaı qımastyqpen qoshtasyp, eki-úsh túıinshegin arbasyna tańyp, baspana izdeýge shyǵady. Degenmen, qaq- soqpen isi joq, adal eńbekpen kún kórip júrgen erli-zaıyptylarǵa Táńirdiń ózi qolushyn bergisi keldi me, tosynnan baspananyń tabyla ketkeni. Osy bazarda kólikke qajetti temir tetikterin satatyn Muhtar esimdi el aǵasy Gúlshattyń kóńilsiz túrin kórip, jón surasa ketti.
– Myna balalardy nege úıińe qaldyryp ketpeısiń? Bazarda sapyrylysqan halyq, biri bolmasa biri qaǵyp ketýi ábden múmkin ǵoı. Jazym degen aıaqastynan, temir-tersek túsip ketse qaıtesiń, – dep janashyrlyq tanytady. Eki kúnnen keıin Muhtar aǵasy Gúlshattyń qolyna baspana kiltin usynyp, alystaý bolsa da panalaı turýǵa keńes beredi. Sol kúni- aq Nurlan men Gúlshat ıesiz úıdi alastap, ishi-syrtyn aqtap, kirip alady. «Óz úıim – óleń tósegim» degen osy shyǵar. Eki bólmeniń ishi shattyqqa tolyp shyǵa keldi.
Qazir Gúlshattyń otbasynan baqytty eshkim joq shyǵar. Erli-zaıyptynyń eski bolsa da, kóligi bar. Eń bastysy, ekeýiniń de nápaqa taýyp otyrǵan jumysy bar. Kúnde jumysqa asyqqan Gúlshat úsh termosty ystyq sýǵa toltyryp alady. Qanty, tátti toqashy taǵy bar. Sosyn túske qaraı úıine bir soǵyp, balalaryn tamaqtandyryp qaıta ketedi. Sońǵy kezderi bazardaǵy asqana meńgerýshisimen kelisip, ystyq sýdy sol jaqtan alatyn bolǵan. Ári sol asqana pisiretin baýyrsaq, samsa, bálishterdi qosa satady. Óziniń de, asqananyń da saýdasyn júrgizip júr. Osylaısha Gúlshattyń qoıý kúreń sháıi men ystyq bálishinen soń, bazarshylardyń da jumysy dóńgelenip júre beredi.
Gúlshattyń aıtýynsha, ózi kópbalaly otbasynan shyqqan. Joldasy da bir otbasynyń ortanshy uly eken. Osy jazda shaǵyn jer telimin satyp alypty. Sátin salsa, kóktemde úı salý oılarynda bar. Qazir ekeýlep qarjy jınap júrgen syńaıly. Eń bastysy, adal eńbekpen nanyn taýyp júrgen otbasynyń uıqysy tynysh. Eńbek adamy osylaı bolsa kerek.