Damýyndaǵy basymdyq polısentrlik modelge beriledi – Almaty ákimiAlmaty qalasynyń ákimi Darhan Satybaldy shahardyń áleýmettik ınfraqurylymyn jańǵyrtý jáne turǵyndardyń ómir súrý sapasyn jaqsartý boıynsha aýqymdy jumystar qolǵa alynǵanyn atap ótti. Ol Qala kúnine oraı almatylyqtardy merekesimen quttyqtap, shahar damýynyń jańa kezeńindegi mańyzdy jobalardy tanystyrdy.
Qala ákimi atap ótkendeı, shahar damýyndaǵy basymdyq - polısentrlik modelge beriletin bolady. Bul model Almatynyń ár aýdanynda zamanaýı ortalyqtar qurýdy kózdeıdi, olarda turǵyndarǵa qolaıly jumys oryndary, mektepter, emhanalar, saıabaqtar men demalys aımaqtary qoljetimdi bolady.
«Negizgi maqsat – qalanyń ortalyǵyn júktemeden bosatý jáne ár aýdanda turǵyndardyń ómir súrýine qolaıly ortalyqtar qalyptastyrý. Onda turǵyndar úshin jaqyn jerde jumys oryndary, mektepter, emhanalar, saıabaqtar men demalys oryndary qoljetimdi bolýy tıis», - dedi qala basshysy.
Darhan Satybaldy jańa ınfraqurylym salý men jańǵyrtý boıynsha júıeli jumystar júrgizilip jatqanyn aıtty. Qazirdiń ózinde «Shyǵys» jáne «Batys qaqpalaryn» damytý belsendi júrgizilýde.
Sondaı-aq, Almaty ákimi Darhan Satybaldy qalany sapaly syrtqy jaryqtandyrýmen qamtý jyl sońyna deıin 100%-ǵa jetetinin málimdedi. Onyń aıtýynsha, aldaǵy jyldary 40-qa jýyq saıabaq pen skver salý jáne jańǵyrtý josparlanǵan. Ári qalanyń iri kóshelerinde «qasbetten qasbetke deıin» qaǵıdaty boıynsha keshendi abattandyrý jumystary júrgiziletin bolady.
Bıyl Almatyda 400-den astam aýla abattandyrylyp, 360 myńnan astam jasyl jelek pen 10 myńdaǵan aǵash otyrǵyzylǵan. Oǵan qosa buryn jaryqtandyrylmaǵan 1200-den astam ýchaske sapaly jaryqpen qamtylǵan.
«Keler jyldary shaharymyz aıtarlyqtaı túrlenip, almatylyqtar bul oń ózgeristerdi anyq baıqaıtyn bolady»,- dedi Almaty qalasynyń ákimi Darhan Satybaldy.