Almaty qalasy kólik júıesin damytý men ekologıalyq ahýaldy jaqsartýda jańa beleske qadam basty. Bul týraly Qala kúni merekesinde megapolıs basshysy Darhan Satybaldy málim etti. Ol qala turǵyndaryn merkesimen quttyqtap, shahardyń ınfraqurylymdyq damýyndaǵy basym baǵyttaryn atap kórsetti.
“Aldaǵy jyldary Almatyda halyqaralyq standarttarǵa saı zamanaýı ári ıntegrasıalanǵan kólik júıesi qalyptasatyn bolady. Bul jolaýshylar úshin qolaıly, qaýipsiz ári ekologıalyq taza sheshim bolmaq. Qazirdiń ózinde uzyndyǵy 100 shaqyrymnan astam BRT jelisin damytý baǵdarlamasy iske asyrylyp jatyr. Onyń nátıjesinde qoǵamdyq kóliktegi jolaýshy tasymaly eki eseden astam artyp, qozǵalys jyldamdyǵy 15%-ǵa ósedi. Sonymen qatar, LRT jelileriniń qurylysy bastalyp, metronyń 20 km-den astam jańa tarmaǵy júrgiziledi”, — dedi qala ákimi.
Darhan Satybaldynyń aıtýynsha, ekologıalyq transformasıa Almatynyń basty basymdyqtarynyń biri bolyp qalady. Qalada tómen emısıalyq aımaqtar engizilip, JEO-2 men JEO-3 tolyqtaı tabıǵı gazǵa kóshiriledi.
“Qazaqstandaǵy alǵashqy turmystyq qaldyqtardy energetıkalyq kádege jaratý zaýyty Almatyda salynady. Zaýyt táýligine 2 myń tonnaǵa deıin qaldyqty qaıta óńdep, jylyna 60 mVt elektr energıasyn óndiredi. Munyń bári 2028 jylǵa qaraı Almatydaǵy aýa sapasyn eki esege jaqsartýǵa múmkindik beredi. Bul – megapolıstiń basty mindetteriniń biri – turǵyndardyń ómir súrý sapasyn arttyrýǵa jasalǵan naqty qadam”, — dedi shahar basshysy.
Almaty ákimdigi kólik ınfraqurylymyn damytyp, ekologıany jaqsartý jáne turaqty damýǵa negizdelgen qala modelin qalyptastyrý shahardyń basym damý baǵyty bolyp qalatynyn basa belgiledi.