Qaýly jobasyn Qarjy naryǵyn retteý jáne damytý agenttigi jarıalaǵan.
Jeke tulǵaǵa qarjy jylyna belgilengen AEK-tiń 45 eselengen mólsherinde, 45 kúnge deıingi merzimge beriledi, dep habarlaıdy aqshamnews.kz
Qazaqstanda shaǵyn nesıeler berý týraly kelisimderdi jasasý tártibine ózgerister engizý josparlanyp otyr. Qaýly jobasy «Ashyq NQA» portalynda jarıalandy.
«Jeke tulǵamen respýblıkalyq búdjet týraly zańda tıisti qarjy jylyna belgilengen aılyq eseptik kórsetkishtiń 45 eselengen mólsherinen aspaıtyn mólsherde, kúntizbelik 45 kúnge deıingi merzimge jasalǵan mıkronesıe berý týraly sharttyń jalpy talaptary qamtylady», - delingen qujatta.
Túzetýler «Qazaqstan Respýblıkasynyń keıbir zańnamalyq aktilerine nesıe berý kezinde táýekelderdi barynsha azaıtý, qaryz alýshylardyń quqyǵyn qorǵaý, qarjy naryǵyn retteýdi jáne atqarýshylyq is júrgizýdi jetildirý máseleleri boıynsha ózgerister men tolyqtyrýlar engizý týraly» QR Zańynyń 17-tarmaǵynyń 3-tarmaqshasyn iske asyrý sheńberinde jasalǵany da jazylǵan.
Qujat jobasyna sáıkes, mynadaı talaptar qamtylady:
mıkronesıe somasyn qaıtarý jáne (nemese) mıkronesıe berý týraly shart boıynsha syıaqy tóleý jónindegi mindettemeni buzǵany úshin aıypaqynyń (aıyppuldyń, ósimpuldyń) mólsheri merzimi ótken árbir kún úshin oryndalmaǵan mindetteme somasynyń 0,2 paıyzynan aspaıdy;
mıkronesıeniń mánin qospaǵanda, mıkronesıe berý týraly shartta kózdelgen syıaqy men aıypaqy (aıyppul, ósimpul) somasyn qosa alǵanda, mıkronesıe berý týraly shart boıynsha qaryz alýshynyń barlyq tólemi jıyntyǵynda mıkronesıe berý týraly sharttyń búkil qoldanys kezeńi úshin berilgen mıkronesıe somasynyń jartysynan aspaıdy;
taraptardyń kelisimi boıynsha mıkronesıe berý týraly sharttyń qoldanys merzimin kúnine 0,2 paıyzdan aspaıtyn shart boıynsha syıaqyny kózdeıtin jaqsartatyn talaptarda kúntizbelik 45 kúnnen aspaıtyn merzimge eki retten astam emes ulǵaıtýǵa bolady.
Qaýly jobasy 19 tamyzǵa deıin qoǵamdyq talqylaýda bolady. Sondaı-aq 20 tamyzdan bastap qaýly qoldanysqa engiziledi jáne resmı jarıalanýǵa tıis.