Ótken aptanyń jeksenbisinde UQK Shekara qyzmetiniń Almaty oblysy boıynsha departamentine qarasty Raıymbek aýdany shekara basqarmasynda ótken saltanatty rásim «Kúz-2024» shaqyrylymy sarbazdarynyń ata-analarymen suhbattasýdan bastaldy.
Qatardaǵy jaýynger Nurjan Sýrovtyń ata-anasy Isqar aǵamyz ben Elmıra apaı búgingi sharaǵa arnaıy qatysý úshin Jambyl oblysy, Qordaı aýdanynyń Qyzylsaı aýylynan kelipti. Olar bizben jyly amandasyp, suhbat berýge yqylas tanytty. Sýrovtardan bilgenimizdeı, uldary Nurjan áskerı qyzmetke óz erkimen suranypty.
— Ata-ananyń kóńili balada ǵoı... Ulymyzdy kórip, maýqymyzdy basý úshin saǵynyp jettik. Kózimizdiń qarashyǵy búgin ant qabyldaıyn dep jatyr. Bul da ulymyzdyń er-azamat atanǵanynyń belgisi. Biz úshin osy qýanyshyn kórýden asqan baqyt bar ma? – dedi tolqyǵan Isqar Sýrov.
Osy kezde olardyń tý syrtynda, alań boıynda sap túzegen 500-ge jýyq jas sarbazdyń biri, qatardaǵy jaýynger N.Sýrov ta tolqyp tur edi.
Saltanatty rásimdi ashqan departament bastyǵy polkovnık Álibek Kaıýpovtyń buıryǵymen alańǵa Jaýyngerlik Tý jetkizilgennen keıin «Kúz-2024» shaqyrylymynyń sarbazdary ant qabyldaı bastady. Sarbazdardyń «Men, qatardaǵy jaýynger ...» dep bastalatyn daýystarynan olardyń shekarany qorǵaýǵa, týǵan eliniń tynyshtyǵy úshin barlyq qıyndyqtarǵa daıyn ekendikteri sezilip turdy.
Saltanatty rásimniń negizgi bólimi bastalyp, departament bastyǵy polkovnık Á.Kaıýpov pen Uıǵyr aýdanynyń ákimi B.Eleýsizova sóz sóılep, sarbazdardy ant qabyldaýlarymen quttyqtady. Sarbazdar atynan sóılegen qatardaǵy jaýynger Dıas Tilektes te senimdi aqtap, el shebin kúzetýge ýáde berdi.
Rásim barysynda departament bastyǵy polkovnık Á.Kaıýpov «Srochnık 2.0» baǵdarlamasynyń grantyn jeńip alǵan «Kúz-2023» shaqyrylymynyń sarbazdary Rasýl Artyqjanov pen Edil Tileýbekke sertıfıkattar tabystap, Otan aldyndaǵy qyzmetteri úshin alǵys bildirdi.
Shara shekara basqarmasynyń arnaýly maqsattaǵy utqyr is-qımyldar tobynyń kórinis kórsetýimen jalǵasty. Shekarashylar shekara buzýshylardy ustaý ádis-tásilderin kórsetip, jaýyngerlik daıarlyqtarynyń joǵary deńgeıde ekenin dáleldedi.
«Men qazaqpyn» áni. Áýelde Qarýly Kúshterdiń áskerı sherýinde oryndalǵan bul án búgingi kúni shekarashy sarbazdardyń ánuranyna aınalǵandaı. Ándi 500 sarbazben birge alań shetine jınalǵan halyq ta oryndady. Ánniń qudireti degen osy shyǵar, bálkim.
Saltanatty rásimnen keıin ata-analar uldarymen qaýyshyp, máz-meıram bolǵan.
Iá, halqyńa, onyń zańdy saılanǵan Prezıdentine, ózińe sert berý – tamyry tereńde jatqan jaýyngerlik dástúr. Osynaý aıryqsha sátti bastan ótkergen sarbazdar senimge selkeý túsirmeıtinine senim mol.