Memleket basshysy bıylǵy 1 qyrkúıektegi «Ádiletti memleket. Birtutas ult. Berekeli qoǵam» atty Joldaýynda jańa strategıaǵa sáıkes basty memlekettik ınstıtýttardy keshendi túrde qaıta jańǵyrtýǵa kirisý qajettigin atap ótken edi.
«Bul qadam bizge ár azamatymyzdyń ál-aýqatyn arttyrý jáne búkil elimizdi órkendetý jolyndaǵy ortaq jumysty jandandyrýǵa múmkindik beredi», – degen ol bılik óziniń josparyn qoǵamnan jasyryn ustaıtyn saıası dástúrden arylýy qajettigin qadap aıtty.
«Ádiletti Qazaqstandy qurý jolynda túbegeıli jáne jan-jaqty reformalardy tabysty júzege asyrý úshin halyqtyń jańa senim mandaty qajet. Men úshin memleket múddesi bárinen bıik. Sondyqtan men ókilettik merzimimdi qysqartýǵa jáne kezekten tys Prezıdent saılaýyna barýǵa daıynmyn. Sondaı-aq, men kóp oılanyp, Prezıdent ókilettigi merzimderiniń sanyn jáne uzaqtyǵyn qaıta qaraý qajet degen baılamǵa keldim»,– dep, bıylǵy kúzde kezekten tys Prezıdent saılaýyn ótkizýdi, al Prezıdent mandatyn uzaqtyǵy 7 jyldyq bir merzimmen shekteýdi jáne qaıta saılanýǵa tyıym salýdy usynǵan bolatyn.
Bul bastamanyń negizine kelsek, Qasym–Jomart Toqaev tujyrymdaǵandaı, bir jaǵynan, 7 jyl – kez kelgen aýqymdy baǵdarlamany júzege asyrý úshin jetkilikti kezeń. Ekinshi jaǵynan, Prezıdent mandatyn bir merzimmen shekteý Memleket basshysynyń jalpyulttyq damýdyń strategıalyq mindetterin sheshýge barynsha jumylýyn qamtamasyz etpek. Iaǵnı, bul konstıtýsıalyq jańalyq bılikti monopolızasıalaý qaýpin aıtarlyqtaı azaıtatyndyqtan da prezıdentti bir merzimge ǵana saılaý normasyn engizý usynylyp otyr.
«Biz bılikti jasaqtaýdyń jáne onyń qyzmetin qamtamasyz etýdiń órkenıetti qaǵıdattaryn bekitýge tıispiz. Jańa prezıdenttik júıe saıası turaqtylyqty nyǵaıtyp, qoǵamdyq qurylystyń qazaqstandyq úlgisin ornyqtyrady. Prezıdentti bir merzimge ǵana saılaý normasyn saılaýdan keıin Parlamenttiń qaraýyna usynamyn. Parlament oń sheshim qabyldasa, Otanymyzda jańa saıası dáýir bastalady. Elimizdi saıası jańǵyrtý úderisinde parlamentarızmdi damytý isi aıryqsha oryn alady. Jańarǵan Ata zańymyz ádil ári ashyq erejeleri bar saıası júıeniń múlde jańa standarttaryn engizedi.
Parlament pen máslıhattardy partıalyq tizim jáne bir mandatty okrýg boıynsha jasaqtaýdyń tyń tásilderi iske qosylady. Jalpy, konstıtýsıalyq reformada kózdelgen ınstıtýsıonaldyq ózgeristiń bárin osy jyldyń sońyna deıin zańmen bekitip, aıaqtaý qajet. Bul ózgerister saıası partıalardyń sanyn arttyrady, saıası básekeni kúsheıtedi, halyq qalaýlylarynyń jańa legi paıda bolýyna septigin tıgizedi»,– degen bolatyn Prezıdent.
16 qyrkúıekte Parlament palatalarynyń birlesken otyrysynda depýtattar «Qazaqstan Respýblıkasynyń Konstıtýsıasyna ózgerister men tolyqtyrý engizý týraly» Qazaqstan Respýblıkasynyń zańyn qabyldady.
Halyq qalaýlylary qabyldaǵan saıası reformalar paketi elimizdiń saıası júıesindegi serpilisti ańǵartady, Qazaqstan tyń demokratıalyq úrdiske baǵyt aldy. Bul úrdis boıynsha el Prezıdenti endigi jerde bir merzimge qaıta saılaný quqyǵynsyz saılanady.Taǵy bir jańalyq, Konstıtýsıalyq sot sýdıalarynyń ókiletti merzimi prezıdenttik jáne parlamenttik ókilet merzimderinen uzaqtaý bolady.
Bul rette QR Memlekettik keńesshisi Erlan Qarın paıymdaǵandaı, Parlamenttiń birlesken otyrysynda qabyldanǵan Konstıtýsıaǵa engizilgen ózgertýler saıası júıeniń boljamdylyǵy men ornyqtylyǵyn qamtamasyz etpek.
«Búgin Parlament qabyldaǵan saıası reformalardyń paketi Qazaqstannyń jańa demokratıalyq modelge kóshkenin bildiredi. Bul modelde Prezıdent bir merzimge qaıta saılaný quqyǵynsyz saılanady. Onyń ústine bul norma ózgerissiz qalady jáne qaıta qaraýǵa múmkin bolmaıdy. Bul reformalardyń paketin buryn iske asyrylǵan konstıtýsıalyq reformamen birge qaraý qajet: jańa Konstıtýsıalyq sot ınstıtýty quryldy; bir mezgilde Parlamenttiń ókilettigi keńeıip, Prezıdenttiń ókileti qysqartyldy; aralas saılaý júıesi engizilip, partıalardy tirkeý rásimi ońaılady; óńirlerdiń derbestigi kúsheımek», - dep jazdy Memlekettik keńesshi óziniń telegram kanalynda.
Demek, qoǵam jańa demokratıalyq úlgi boıynsha Ádiletti Qazaqstanǵa qaraı alǵashqy qadamyn jasady. Elimizde bastalǵan jańa saıası dáýirge sáttilik tileıik!