Astana qalasynda 2026 jyldan bastap engiziletin jańa Salyq kodeksin túsindirýge arnalǵan respýblıkalyq semınarlar serıasy aıaqtaldy.
Qorytyndy is-sharaǵa Premer-mınıstrdiń orynbasary – Ulttyq ekonomıka mınıstri Serik Jumanǵarın, Qarjy mınıstri Mádı Takıev, Memlekettik kirister komıteti jáne «Atameken» kásipkerler palatasynyń ókilderi qatysty, - dep habarlaıdy Aqshamnews.kz.
Vıse-premer bıznes úshin mańyzdy sanalatyn arnaıy salyq rejımderin qoldaný máselesine erekshe toqtaldy.
«Eń bastysy – buǵan deıin ońaılatylǵan salyq rejıminde jumys istegen kásipkerler sol rejımde jumysyn jalǵastyra beredi», – dedi Serik Jumanǵarın.
Sonymen qatar, óńdeý ónerkásibi salasyna arnalǵan arnaıy erejeler de engizilmek. Vıse-premerdiń aıtýynsha, túpki tutynýshymen tikeleı jumys isteıtin kásiporyndar ońaılatylǵan salyq rejımin qoldana alady.
«Óńdeý ónerkásibiniń keıbir kásiporyndaryna ruqsat beremiz. Olar, negizinen, ofsette nemese iri kásiporyndardyń jetkizýshisi bolyp sanalmaıtyn B2C sektoryna baǵyttalǵan bolýy tıis», – dep naqtylady Serik Jumanǵarın.
Basqa sektorlar úshin jalpyǵa birdeı belgilengen salyq salý tártibi qarastyrylǵan. Munyń sebebi – qoldanystaǵy salyqtyq yntalandyrý sharalarynyń bar bolýy: óndiristik maqsattaǵy ımport taýarlaryna QQS eseptelýi, jańǵyrtý jumystary kezinde salyq jeńildikteri jáne salany memlekettik qarjylyq qoldaýdyń aýqymdy sharalary.
«Biz damý ınstıtýttary boıynsha úlken baǵdarlama júzege asyryp jatyrmyz. Bıyl "Báıterek" holdıńine 1 trıllıon teńgege jýyq qarajat bólindi, ári aldaǵy úsh jyldyq búdjette jyl saıyn 1 trıllıon teńgeden qarjy qarastyrylǵan. Óńdeý ónerkásibine jasalyp otyrǵan qoldaý sharalary qomaqty qarjyny talap etedi, sol sebepti bul sala qoldaýdan tys qalmaıdy», – dep qorytyndylady Serik Jumanǵarın.