Densaýlyq saqtaýǵa bólinetin qarjy kólemi de ulǵaıa beredi.
Senat Spıkeri Máýlen Áshimbaev bastaǵan Palata depýtattary elordadaǵy Ulttyq neırohırýrgıa ortalyǵyna baryp, medısınalyq nysannyń negizgi qurylymdarynyń jumysymen tanysty, dep habarlaıdy Almaty-akshamy.kz.
Máýlen Áshimbaev qazaqstandyqtardyń densaýlyǵyn jaqsartýda, densaýlyq saqtaýdyń sapasy men qoljetimdiligin arttyrýda Ulttyq neırohırýrgıa ortalyǵynyń róli zor ekenin aıtty. Bul sala memleketimizdiń áleýmettik saıasatynyń mańyzdy bóligi ekeni belgili.
Senat Tóraǵasy aldaǵy ýaqytta elimizde osy salany damytý jumystary odan ári jalǵasa beretinin jáne medısınalyq qyzmetkerlerdi qoldaý úshin barlyq tıisti sharalar qolǵa alynatynyn atap ótti.
«Memleket basshysy densaýlyq saqtaý salasyna únemi basa mán berip keledi. Densaýlyq saqtaýǵa bólinetin qarjy kólemi de ulǵaıa beredi. Mindetti áleýmettik medısınalyq saqtandyrý júıesi jetildiriledi. Qazirgi tańda halyq tarapynan atalǵan saqtandyrý júıesine qatysty túrli synı pikirler jıi aıtylyp júr jáne olar negizsiz emes. Búginde 3 mln-ǵa jýyq azamatymyz medısınalyq saqtandyrýdan tys qalyp otyr. Sondaı-aq aldaǵy ýaqytta dáriger mártebesi zańmen bekitiledi. Medısınalyq qyzmetkerlerdi qorǵaý jáne qoldaý sharalary kúsheıip, mamandyqtyń mártebesi arta túsedi. Memleket basshysynyń tapsyrmasymen jyl saıyn medısınalyq qyzmetkerlerdiń jalaqysyn ulǵaıtýǵa qatysty sharalar qabyldanyp jatyr», – dedi Máýlen Áshimbaev.
Atalǵan is-shara barysynda senatorlarǵa radıologıa jáne radıohırýrgıa bólimshesiniń jumysy týraly málimetter berildi. Munda zamanaýı «Gamma-pyshaq» kesheni ornatylǵan. Ol kúrdeli neırohırýrgıalyq ota jasaýǵa múmkindik beredi.
Ortalyq tóraǵasy Serik Aqsholaqovtyń aıtýynsha, «Gamma-pyshaq» isikterdi, qan tamyrlary men fýnksıonaldyq mı aýrýlaryn emdeý úshin qoldanylady. Bul jaǵdaıda mıdyń saý tinderi jáne naýqastyń búkil denesi sáýlelenbeıdi. Sonymen qatar depýtattarǵa gospıtáldyq farmasıa bólimshesiniń qyzmeti tanystyryldy. Onda emdeýdiń tıimdiligin jáne dárilik zattardy paıdalanýdyń utymdylyǵyn arttyrýǵa múmkindik beretin tehnologıalar bar.
Kezdesýge Áleýmettik-mádenı damý jáne ǵylym komıtetiniń músheleri Aqmaral Álnazarova jáne Baqytjan Jumaǵulov, elimizdiń Densaýlyq saqtaý mınıstri Ajar Ǵınıat, sondaı-aq ortalyqtyń qyzmetkerleri qatysty.