Investısıalardyń jalpy kólemi aldyńǵy jylmen salystyrǵanda 38 paıyzǵa ósken.
Búgin Úkimet otyrysynda Qazaqstannyń 2026 jylǵa deıingi Investısıalyq saıasaty tujyrymdamasy bekitildi, dep habarlaıdy Almaty-akshamy.kz Primeminister.kz silteme jasap.
«Memleket basshysy Qasym-Jomart Kemeluly Toqaevtyń tapsyrmasy boıynsha Investısıalyq saıasattyń jańa tujyrymdamasy ázirlendi. Bul qujat el ekonomıkasyna tartylatyn ınvestısıalardyń ósýine aıtarlyqtaı yqpal etetin bolady. Jalpy, biz ınvestısıalar ósiminiń pandemıaǵa deıingi deńgeıine jettik. Bıylǵy jyldyń 5 aıynda negizgi kapıtalǵa salynǵan ınvestısıalar kólemi 2,5 paıyzǵa ósip, 4,1 trln teńgeni qurady», dedi QR Premer-Mınıstri Álıhan Smaıylov.
Úkimet basshysynyń dereginshe, óńirler arasynda bıylǵy jyly Aqmola oblysy, Shymkent jáne Almaty qalalary negizgi kapıtalǵa salynǵan ınvestısıalar ósiminiń joǵary qarqynyn kórsetip otyr. Al, Túrkistan jáne Qaraǵandy oblystarynda bul kórsetkish aıtarlyqtaı tómendep ketken.
«2021-shi jyldyń qorytyndysy boıynsha Qazaqstanǵa tartylǵan tikeleı sheteldik ınvestısıalardyń jalpy kólemi aldyńǵy jylmen salystyrǵanda 38 paıyzǵa ósip, shamamen 24 mlrd dollardy qurady. Salalar boıynsha tikeleı sheteldik ınvestısıalardyń eń kóp ósimi ónerkásipte, saýdada, qarjy jáne saqtandyrý qyzmetinde, kólik pen qurylysta tirkelip otyr», – dedi ol.
Álıhan Smaıylov Qazaqstan tikeleı sheteldik ınvestısıalar úshin tartymdy el ekendigin jáne bul jaǵynan Ortalyq Azıa óńirinde kósh bastap turǵanyn basta aıtty.
«Qazirgi jaǵdaıda biz osy pozısıany nyqtaı túsip, sheteldik ınvestısıalar úshin belsendi qımyldaýymyz kerek jáne ınvestorlarǵa barynsha ońtaıly jaǵdaı jasaýymyz qajet. Sondaı-aq, ekonomıkanyń shıkizattyq emes sektorlarynda ınvestısıalyq jobalardy qarjylandyrý kózderin keńeıtý kerek. Búgin usynylyp otyrǵan Investısıalyq saıasat tujyrymdamasy ekonomıkany damytýdyń jáne halyqtyń ál-aýqatyn arttyrýdyń draıverine aınalatyn jańa ınvestısıalyq sıkldiń bastaýy bolýy tıis. Tujyrymdamada 2026-shy jyly negizgi kapıtalǵa ınvestısıalar deńgeıin Jalpy ishki ónimniń 25,1 paıyzyna deıin jetkizýdi jáne tikeleı sheteldik ınvestısıalar kólemin 25,5 mlrd dollarǵa deıin ulǵaıtýdy kózdeıtin aýqymdy maqsatty ındıkatorlar belgilengen. Memlekettik ınvestısıalyq saıasat sapaly sheteldik jáne ishki ınvestısıalardy tartýǵa, ekonomıkalyq belsendilikti arttyrýǵa jáne halyqtyń tabysyn ulǵaıtýǵa, onyń ishinde jańa turaqty jumys oryndaryn qurýǵa baǵyttalatyn bolady», - degen Premer-Mınıstr tujyrymdamany bekitý úshin daýys berýdi usyndy.
Úkimet músheleri tujyrymdama jobasyn qoldap daýys berdi.