Saýda-sattyqtyń ortasha kúndik kólemi 179 mıllıon dollardan 92 mıllıon dollarǵa deıin qysqardy.
Ulttyq bank tóraǵasy Ǵalymjan Pirmatovtyń aıtýynsha, sáýir aıynda shetel valútasyna suranys azaıǵan, dep habarlaıdy Almaty-akshamy.kz
Ótken aıda teńge baǵamy 4,6 prosentke nyǵaıdy.
Aıtýynsha, ótken aıda jahandyq qarjy naryǵyndaǵy qubylmalylyqtyń jalǵasýyna qaramastan, teńge baǵamy 1 dollar úshin 445,62 teńgege deıin nemese 4,6%-ke nyǵaıdy.
«Sáýirde shetel valútasyna suranystyń aıtarlyqtaı azaıýy baıqaldy. Qazaqstan qor bırjasyndaǵy saýda-sattyqtyń ortasha kúndik kólemi 179 mıllıon dollardan 92 mıllıon dollarǵa deıin qysqardy», - dedi Pirmatov.
Kvazımemlekettik sektor sýbektileriniń valútalyq túsimdi satýy valúta naryǵyna qoldaý kórsetti. Onyń kólemi sáýirde shamamen 253,2 mıllıon dollardy qurady. Respýblıkalyq búdjetke beriletin transfertterdi qamtamasyz etý úshin sáýirde Ulttyq qordan 168,3 mıllıon dollar satyldy. Ulttyq qordan satý úlesi saýda-sattyqtyń jalpy kóleminiń 8,7%-ine teń boldy.
Pirmatov ishki valúta naryǵynda jaǵdaıdyń turaqtalýyna baılanysty Ulttyq bank sáýirde valútalyq ıntervensıa júrgizbegenin atap ótti.
«Aldaǵy ýaqytta geosaıası jaǵdaıdyń qalaı órbıtini belgisiz. Sol sebepti qysqa merzimdi perspektıvada teńgeniń qubylmalylyq táýekeli saqtalady. Ulttyq bank teńgerimsizdikke jol bermeıtin jáne altyn-valúta rezervteriniń saqtalýyn qamtamasyz etetin erkin baǵam rejımin ustana beredi», - dedi Pirmatov.