Maýsymnyń 5 kúni Qazaqstanda Konstıtýsıaǵa túzetýler boıynsha referendým ótetin boldy.
Almaty qalasy Qoǵamdyq Keńes múshesi Borıs Djaparov qazaqstandyqtardy maýsymnyń 5 kúni ótetin referendýmǵa belsene qatysýǵa shaqyrdy, dep habarlaıdy Almaty-akshamy.kz.
«Qurmetti otandastar, Qazaqstan halqy tarıhı damýdyń sheshýshi kezeńiniń aldynda tur. Eski komýnıstik rejımniń kúıreýinen soń táýelsizdigin alǵan elimizdiń sýperprezıdenttik basqarý júıesi búgingi kún talabyna saı emestigin «qańtar qyrǵyny» aıqyn kórsetti.
Sýperprezıdenttik bılik 30 jylda Qazaqstandy «sýper memleketke» aınaldyra almady, kerisinshe el ekonomıkasy men halyqtyń áleýmettik jaǵdaıy kúrt tómendep ketti. Osy ýaqyt ishinde joǵary bılikke etene jaqyn 160-qa jýyq olıgarhıalyq toptar paıda bolyp, el dáýletiniń qyzyǵyn, halyq emes, tek solar kórdi. Qasym-Jomart Kemeluly Toqaevtyń Prezıdent bolyp saılanýynan keıin etek ala bastaǵan demokratıalyq ózgerister Qazaqstan halqynyń qoldaýyna ıe bola bastaǵan kezde, uzaq jyldar sheksiz bılik pen baılyqqa daǵdylanǵan, osy toptyń «marqasqalary» tóńkeris jolymen memlekettegi saıası bılikti óz qoldaryna qaıta alýǵa qarýly áreket jasap, táýelsizdik taǵdyryna qaýyp tóndirdi.
Mine osyndaı kún el basyna qaıtadan tónbeý úshin, elimizdi damyǵan dáýletti de, ádiletti, shyn mánindegi demokratıalyq memleketter qataryna qosý maqsatta Prezıdent Qasym-Jomart KemelulyToqaev «Jańa Qazaqstan» tujyrymdamasy men baǵdarlamasyn usynyp, buqara halyqtyń kóńilinen shyqty.
Baǵdarlamada kórsetilgen ıgi maqsattarǵa qol jetkizý úshin eń aldymen ózgeristerdiiń zańdyq negizderin qurý qajet. Sol sebepten ústimizdegi jyly maýsym aıynyń 5-i kúni Qazaqstanda Konstıtýsıaǵa túzetýler boıynsha referendým ótetin boldy. Referendýmǵa qatysýshylar usynylǵan árbir túzetýler boıynsha óz pikirin bildire alady. «Aqyldasyp pishken ton kelte bolmas» degen halyq. Sondyqtan, elimizdiń ár azamatyn referendýmǵa belsene qatysyp, batyldyq tanytyp, el bolashaǵyn aıqyndaıtyn Ata Zańymyzdyń sapaly da mazmundy bolyp shyǵýyna jeke úlesin qosýǵa shaqyramyn», - dep jazdy Borıs Djaparov áleýmettik jelidegi paraqshasynda.