Keı adam úshin janýarlar jaı ǵana súıikti serik emes, olar otbasynyń bir múshesi. Olarǵa qamqorlyq jasap, birge serýendep, oınatady. Sondyqtan saparǵa shyqqanda birge alyp shyǵýy da zańdy qubylys. Saıahattyń tynysh ári jaıly ótýi úshin aldyn ala janýaryńyzdyń qaýipsizdigi men qolaıly jaǵdaıyn oılastyrǵan jón.
Janýarlardy alyp júrýdiń jalpy erejeleri
Janýardy jabyq kólikte qaldyrmańyz. Qyzyp ketý nemese tońý birneshe mınýttyń ishinde oryn alýy múmkin.
Janýardy salonda erkin júrip-turýyna jol bermeńiz. Bul júrgizýshige jáne oǵan qaýipti.
Arnaıy tor, qaýipsizdik beldigi nemese qosymsha quraldardy paıdalanyńyz. Bul kenet tejegishti basqan jaǵdaıda jaraqat alý qaýpin azaıtady.
Jaıly orta qalyptastyryńyz. Áýen, jaryq pen ıisterdiń bolmaýy janýardyń mazasyzdanýyn tómendetedi.
Temperatýra men jeldetýdi qadaǵalańyz. Salonda ystyq ta, sýyq ta bolmaýy tıis - tek jaıly mıkroklımat.
Paıdaly keńes: Saparǵa shyǵardan birneshe kún buryn janýaryńyzdy tasymaldaý toryna nemese kólikke úıretip alyńyz. Ol ıisin tanyp, óz ornyn qaýipsiz meken retinde qabyldasyn.
🐕 Itter
Uzaq saparda ár 2–3 saǵat saıyn aıaldama jasap, janýarǵa serýendep, qajetine barýǵa múmkindik berińiz.
Eń qolaılysy ıtti tasymaldaý torynda nemese salonmen jalǵasqan júksalǵyshta alyp júrý.
It qusýǵa beıim bolsa, absorbsıalyq jórgekter men sýlyqtardy aldyn ala daıyndap qoıyńyz.
Ystyq kúnderi ıtke sý qajet: arnaıy quty men yńǵaıly tostaǵandy umytpańyz.
🐈 Mysyqtar
Mysyqtarǵa qatty nemese mata torlary bar arnaıy tasymaldaǵysh óte qolaıly.
İshine tanys oıynshyq nemese ıesiniń ıisi sińgen kórpe salyp qoısańyz, janýar ózin jaıly sezinedi.
Mysyq qatty úreılense, baý taǵyp, qolyńyzǵa ustaýǵa bolady. Biraq tek siz kólik júrgizbegen jaǵdaıda.
🦜 Qustar
Kádimgi tordyń ornyna aýa kiretin tesikteri bar jeńil qorap nemese konteıner paıdalanǵan durys.
Qysta tońyp qalmaýyna, al jazda qyzyp ketpeýine nazar aýdaryńyz. Eń qolaıly temperatýra – 20-25 C.
Qusty tynyshtandyrý úshin qorabyn nemese toryn jeńil matamen búrkep qoıyńyz, biraq aýa almasýy saqtalýy tıis.
🐹 Kemirgishter
Alaman, egeýquıryq jáne teńiz dońyzyn plasık tasymaldaǵyshta, ishinde azyǵy men sýy bar kúıde alyp júrgen durys.
Tordy tereze janyna qoımańyz. Kúnniń sáýlesi men jel zıan keltiredi.
Ystyqta janýardy salqyndatý úshin dymqyl maılyqty paıdalanyńyz.
🦎 Baýyrymen jorǵalaýshylar men qosmekendiler
Jylan men kesirtkege arnaıy matadan tigilgen qap nemese plasık konteıner yńǵaıly.
Qosmekendilerge (baqa, trıton) ylǵaldy orta qajet, sondyqtan konteıner túbine dymqyl maılyq nemese sýlanǵan qaǵaz tóseý kerek.
Negizgi talap – turaqty temperatýra: baýyrymen jorǵalaýshylar kenet ózgeristerdi kótere almaıdy.
Shaǵyn laıfhak: saparǵa shyqqanda árqashan janýaryńyzǵa arnalǵan shaǵyn «jol dáriqobdıshasyn» alyńyz. Alǵashqy kómekke qajet quraldar men jol boıyndaǵy eń jaqyn veterınarlyq klınıkanyń baılanys nómirlerin jazyp qoıyńyz.