Shildeniń 24-ne deıin úmitkerler úgit-nasıhat jumystaryn júrgizedi.
25 shildede Qazaqstannyń birqatar óńirinde ákimderdiń saılaýy bastalady. Saılaýdyń bul túri eldi demokratıalandyrýǵa baǵyttalǵan, halyqtyń erkin eskerip, tańdaý jasaý quqyǵyn berýdi kózdeıtin mańyzdy betburys bolady degen úmitpen qolǵa alynyp otyr, dep habarlaıdy Almaty-akshamy.
Prezıdenttiń saıası máseleler jónindegi kómekshisi Erlan Qarın bul saılaý Memleket basshysy usynǵan saıası reformalardyń ekinshi jáne úshinshi paketteriniń aıasynda iske asyp jatqanyn aıtyp júr.
Esterińizge sala ketsek, Prezıdent Qasym-Jomart Toqaevtyń «Qazaqstan Jańa naqty ahýalda: is-qımyl ýaqyty» atty Joldaýynda 2021 jyldan bastap aýyl ákimderiniń tikeleı saılaýyn ótkizý týraly tapsyrma berilgen bolatyn.
Úkimet Prezıdent Joldaýyn iske asyrý jónindegi jalpyulttyq jospardyń 139 jáne 140-tarmaqtary boıynsha aýdandyq mańyzy bar qalalardyń, aýyldardyń, kentterdiń, aýyldyq okrýgterdiń ákimderin tikeleı saılaýdy engizý jónindegi zań jobalaryn ázirlep shyqty.
Osylaısha 24 mamyrda Memleket basshysy «Qazaqstan Respýblıkasyndaǵy saılaý týraly «Qazaqstan Respýblıkasynyń Konstıtýsıalyq zańyna ózgerister men tolyqtyrýlar engizý týraly» QR Konstıtýsıalyq zańynyń, «Qazaqstan Respýblıkasynyń keıbir zańnamalyq aktilerine saılaý máseleleri boıynsha ózgerister men tolyqtyrýlar engizý týraly» Zańnyń jańartylǵan nusqalaryna qol qoıdy.
Qujatqa Prezıenttiń tapsyrmasy boıynsha «Qazaqstan Respýblıkasyndaǵy saılaý týraly» Konstıtýsıalyq zańǵa Parlament Májilisin saılaý kezinde saıası partıalardyń ótý shegin 7% -dan 5%-ǵa deıin tómendetý, sondaı-aq barlyq deńgeıdegi saılaý búletenderiniń nysandaryna «Bárine qarsymyn» degen baǵan engizý jónindegi erejeler jańadan engizildi. «Bárine qarsymyn» degen baǵany bar búletender biz aıtyp otyrǵan ákimderdiń tikeleı saılaýynda alǵash ret qoldanysqa engeli otyr.
Resmı statısıka boıynsha, Qazaqstan halqynyń 40%-dan astamy aýyldyq eldi mekenniń turǵyny retinde tirkelgen. Iaǵnı aýyldyq aýmaqtardy basqarýdyń tıimdi tetigin qalyptastyrý isine Qazaqstan azamattarynyń 40%-dan astamy atsalyspaq.
Joǵaryda atalǵan zań boıynsha aýyldyq aýmaqtardyń 2 346 ákimi budan bylaı tikeleı saılaý arqyly anyqtalýy tıis. Bıyl sonyń 775-i óz taǵdyryn aıqyndaıdy.