Atyraýda jyl basynan beri 365 kásipkerdiń quqyǵy buzylǵan.
Memlekettik kiris organdary 269 kásipkerdiń banktegi shotyn jabý týraly zańsyz uıǵarym shyǵarǵan. Bul týraly Almaty-akshamy.kz «Habar24» arnasyna silteme jasap habarlaıdy.
Oǵan qosa salyq qyzmetkerleri talap boıynsha kem-ketikti joıǵan 4 kásipkerdiń esepshotyn birneshe kúnge deıin ashpaı, kásip ıelerin ábigerge salǵan. Olar munymen qoımaı, Wipon qosymshasy arqyly kásipkerlerdiń ústinen ózderi aryz jazyp, keıin ony ózderi teksergen.
Bul iske prokýrorlar aralasyp, 36 kásipkerden zańsyz alynǵan 11 mln teńgeni ıelerine qaıtaryldy.
«Salyq organynyń qyzmetkerleri óz tarapynan kásipkerlerden anyqtalǵan zańbuzýshylyqtar týraly habarlama joldap, ózi teksergen. Nátıjesinde, prokýrorlyq qadaǵalaý aktisi engizilip, zańsyz 51 tekseristiń kúshi joıyldy. Zańsyz tájirıbe toqtatyldy. Zań buzǵandar qatań jaýapqa tartyldy», – dedi qalalyq prokýratýranyń bólim prokýrory Almat Súıeýov.