Kınostýdıa ujymyna jańa basshyny Mádenıet jáne sport mınıstri Asqat Oralov tanystyrdy.
Mınıstr «Qazaqfılm» kınostýdıasynyń jumysyn úılestirý abyroıly ári jaýapty mindet ekenin aıtty, dep habarlaıdy Almaty-akshamy.kz.
Azamat Satybaldy uzaq ýaqyt M.Áýezov atyndaǵy Qazaq memlekettik akademıalyq drama teatrynda eńbek etti. Ǵabıt Músirepov atyndaǵy qazaq memlekettik akademıalyq balalar men jasóspirimder teatryn 3 jyl boıy basqardy. Búgingi kúnge deıin Temirbek Júrgenov atyndaǵy Qazaq ulttyq óner akademıasynyń rektory qyzmetin atqaryp kelgen.
Asqat Oralov mınıstrlik 2030 jylǵa qaraı jalpy kınoprokattaǵy otandyq fılmderdiń, onyń ishinde anımasıalyq fılmderdiń úlesin 35%-ǵa deıin ulǵaıtýǵa nıetti ekenin málimdedi. Bul rette prokattaǵy qazaq tilindegi fılmderdiń úlesin 30%-ǵa deıin jetkizý kózdelip otyr. Mınıstr kınostýdıanyń jańa basshysy men ujymyna sáttilik tilep, tabysty jumys atqaratynyna senim bildirdi.
«Otandyq kınoóneriniń «qara shańyraǵy» sanalatyn Qazaqfılm aýqymdy jáne kúrdeli óndiristik uıym. Byltyr kınostýdıa janynan "Qazaqanımasıa" shyǵarmashylyq birlestigi quryldy. Memleket basshysynyń kınostýdıa jumysyn jańǵyrtý jónindegi tapsyrmasyn júzege asyrý aıasynda 87 tehnıkalyq jabdyq satyp alyndy. Aldaǵy ýaqytta modernızasıanyń 2 kezeńin bastaý kerek»,- dedi Asqat Oralov.