Elimizdegi saılaý ýchaskeleri eń kóp shoǵyrlanǵan Almaty qalasynda da daýys berý qyzý júrip jatyr. Dál qazirgi ýaqytta halyqtyń saılaý aımaqtaryna kelý qarqyny artty, dep habarlaıdy QazAqparat tilshisi.
Elimizdiń mańyzdy oqıǵasynan shet qalmaı, óz tańdaýyn jasaýǵa kelgen qala turǵyndarynyń kóńil-kúıi kóterińki. Ár saılaý ýchaskesi saılaýshylaryn erekshe kútip alýǵa tyrysyp jatyr. Oqýshylar saraıynda ornalasqan №377 saılaý ýchaskesi kelýshilerge naýryz kóje men ystyq baýyrsaqtan dám tatqyzýda.
«Bizdiń saılaý ýchaskesi 2569 adamǵa shaqyrý qaǵazyn bergen bolatyn. Turǵyndar belsendi atsalysyp jatyr. Kóńil-kúıleri óte jaqsy. Biz de óz tarapymyzdan barynsha jaǵdaı jasaýǵa tyrysyp jatyrmyz. Saılaýshylardy áýezdi ánmen qarsy alyp, kóje men baýyrsaq usynýdamyz», - deıdi №377 ýchaskelik saılaý komısıasynyń tóraǵasy Asıa Malımova.
Sondaı-aq atalǵan saılaý ýchaskesine alǵashqylardyń biri bolyp kelgen Mamyrqulovtar syılyq aldy.
«Osy ýaqytqa deıin eshqandaı saıası naýqannan tys qalǵan emespin. Bala-shaǵammen kelip, daýys berý otbasylyq dástúrge aınaldy. Árıne, árqaısymyz óz tańdaýymyzdy jasadyq. Oılamaǵan jerden syılyqqa ıe boldyq», - deıdi qala turǵyny Aıda Mamyrqul.
Aıta keteıik, megapolıste 600-den astam saılaý ýchaskesi jumys istep jatyr.