2024 jyldyń qorytyndysy boıynsha qazaqstandyq oqýshylar 80 zıatkerlik is-sharaǵa qatysty.
Barlyǵy 1,5 mıllıonnan astam (40%) oqýshy qamtyldy. Bul týraly Ortalyq komýnıkasıalar qyzmetinde ótken dóńgelek ústel barysynda belgili boldy, dep habarlaıdy aqshamnews.kz Oqý-aǵartý mınıstrligine silteme jasap.
Ekinshi jyl qatarynan aýyl mektepteriniń oqýshylaryna arnalǵan Respýblıkalyq pándik olımpıada ótkizilip keledi. 2024 jyly onyń mektepishilik kezeńine 113 myńnan astam oqýshy tirkeldi, bul 2023 jylmen salystyrǵanda 35 myńǵa artyq.
«Nátıjesinde, respýblıkalyq olımpıadalarda júldeli oryn alǵan aýyl oqýshylarynyń sany 10 esege jýyq ósti. Bul myńdaǵan bala úshin jańa múmkindikterge jol ashty. Aýyl mektepteri oqýshylaryn zıatkerlik olımpıadalar men baıqaýlarǵa daıyndaý maqsatynda «Daryn» syrttaı mektebi jumysyn bastady. Onda II Respýblıkalyq aýyl olımpıadasynyń myńǵa jýyq fınalısti bilimin jetildirdi», – dep atap ótti «Daryn» RǴPO dırektory ǴajdembekTursynov.
«Daryn» syrttaı mektebinde tájirıbeli ustazdar – respýblıkalyq jáne halyqaralyq olımpıadalardyń birneshe dúrkin jeńimpazdary dáris beredi. Olar pánderdi tereńdetip oqytýmen qatar, olımpıadaǵa daıyndyqtyń strategıalary men ádisterin úıretedi, sondaı-aq paıdaly resýrstardy tıimdi paıdalanýdyń joldaryn túsindiredi.
Jalpy, 2024 jyly 27 respýblıkalyq jáne 5 halyqaralyq oqý-jattyǵý jıyny uıymdastyrylyp, oqýshylar halyqaralyq olımpıadalarǵa daıyndaldy. Nátıjesinde, qazaqstandyq oqýshylar álemdik olımpıadalar men konkýrstarda 563 medal jeńip aldy.