Qazaqstanda respýblıkalyq mańyzǵa ıe avtojoldarda qozǵalystyń ortasha jyldamdyǵyn tirkeıtin avtomattandyrylǵan baqylaý júıesi engizildi. Bul týraly Aqshamnews.kz saıty Tengri Auto-ǵa silteme jasap habarlaıdy.
Jańa júıe kólik quraldarynyń joldyń belgili bir bóliginen ótý ýaqytyn eseptep, ortasha jyldamdyqty anyqtaý arqyly jyldamdyqty arttyrý faktisin tirkeıdi. Atalǵan jańashyldyq qaýipsizdikti arttyrý jáne jol-kólik oqıǵalarynyń aldyn alý maqsatynda engizilip otyr.
Qaı joldarda baqylaý júrgiziledi?
Qazirgi tańda avtomatty júıeler kelesi iri respýblıkalyq trassalarda ornatylǵan:
- Astana – Shýchınsk (jyldamdyq shekteýi: 140 km/saǵ)
- Astana – Pavlodar (140 km/saǵ)
- Shymkent – Qyzylorda (110 km/saǵ)
- Shymkent – Taraz (110 km/saǵ)
- Pavlodar – Semeı – Qalbataý (100–110 km/saǵ)
- Oral – Reseı shekarasy (Saratov baǵyty) (100 km/saǵ)
- Pavlodar – Reseı shekarasy (Omby baǵyty) (100–110 km/saǵ)
Ortasha jyldamdyqty esepteý ádisi — kóliktiń eki baqylaý núktesi arasyndaǵy júrip ótken jol qashyqtyǵyn ótken ýaqytqa bólý arqyly anyqtalady. Bul – dástúrli jyldamdyq ólsheý quraldaryna qosymsha retinde jumys isteıtin tıimdi ádis.
Qandaı jaza qoldanylady?
Ortasha jyldamdyqty arttyrǵany úshin jańa bap engizilmeıdi. Mundaı quqyqbuzýshylyqtar burynnan bar Ákimshilik quqyq buzýshylyq týraly kodekstiń 592-baby boıynsha qaralady:
- 10–20 km/saǵ artyq – 5 AEK (18 460 teńge)
- 20–40 km/saǵ artyq – 10 AEK (36 920 teńge)
- 40 km/saǵ artyq – 20 AEK (73 840 teńge)
- Qaıtalanǵan jaǵdaıda – 30 AEK (110 760 teńge)
- 60 km/saǵ jáne odan kóp – 40 AEK (147 680 teńge)
Jol qaýipsizdigi salasynyń sarapshylary bul bastamany quptap otyr. Ortasha jyldamdyqty baqylaý júıesi júrgizýshilerdi uzaq qashyqtyqta jyldamdyqty shekten asyryp júrýden tejeýge yqpal etedi jáne kezdeısoq aıyppul salý qaýpin azaıtady.
Sonymen qatar bul júıe tek jol erejesin buzýshylardy jazalaý úshin emes, jol-kólik oqıǵalarynyń sanyn azaıtyp, júrgizýshiler arasynda tártipti qalyptastyrý maqsatyn kózdeıdi.
Jańa baqylaý júıesi – Qazaqstan joldaryndaǵy qaýipsizdik mádenıetin arttyrýǵa baǵyttalǵan mańyzdy qadam. Júrgizýshilerge jolda jaýapkershilikpen júrý, jyldamdyq shekteýin saqtaý jáne ýaqytty aldyn ala josparlaý usynylady.