Kólik mınıstrligi avtomobıl jáne temirjoldardyń sý basyp, shaıylyp ketýine jol bermeý úshin sharalar qabyldap jatyr.
Úkimet otyrysy barysynda kólik mınıstri Premer-Mınıstrge avtomobıl jáne temirjoldardyń daıyndyǵy týraly baıandap berdi. Marat Qarabaevtyń málimetinshe, sońǵy 3 jylda respýblıkalyq avtojoldarda sý tasqyny qaýpi bar ýchaskelerdiń sany 20%-ǵa qysqardy. Bıyl táýlik boıy kezekshilik jáne kúndelikti patrúldeý sý tasqyny qaýpi bar 396 ýchaskede, 68 kópirde jáne 650 sý ótkizý qubyrlarynda uıymdastyryldy. Erigen sýdy ótkizý úshin sý ótkizgish qubyrlardyń sańylaýlaryn ashý jáne qardan tazartý jumystary júrgizilýde, dep habarlaıdy Almaty-akshamy.kz Kólik mınıstrligine silteme jasap.
Jedel sharalar qabyldaý úshin barlyq óńirde 10 myń tekshe metr qum, 3 myń tekshe metr qoqys tas, 2 myń tekshe metr qıyrshyq tas jáne 49 myń qap daıyndaldy.
Sý tasqyny qaýpi bar ýchaskelerde avtojoldardy rekonstrýksıalaý sheńberinde ýchaskelerdiń buzylýyn boldyrmaý jáne avtomobılderdiń qaýipsiz ótýin qamtamasyz etý úshin jasandy qurylystardy qosymsha ornatý, sý ótkizý qubyrlarynyń dıametrlerin jáne olardyń sanyn ulǵaıtý, sondaı-aq jer tósemi úıindisiniń bıiktigin arttyrý boıynsha jumystar júrgizilýde.
Temirjol salasynda «Muzjarǵysh pen tasqyn sýlardy ótkizýge jol men jasandy qurylystardy daıyndaý týraly» buıryq bekitildi. Oǵan sáıkes QTJ jáne TJM aýmaqtyq organdary temirjol tóseminen joǵary ornalasqan 83 sý qoımalary men bógetterdiń jaı-kúıin tekserý jumystaryn júrgizýde.
«Sý tasqyny kezeńinde sharalar qabyldaý úshin shamamen 2,6 myń tekshe metr tas, 8 myńnan astam kondısıalyq emes temirbeton shpaldar, 145 qubyr jáne basqa da qajet materıaldar daıyndaldy. Sý tasqyny jaǵdaıy baqylaýda, avtomobıl jáne temirjoldardyń shaıylyp ketýine jol bermeý boıynsha barlyq qajetti shara qabyldanyp jatyr», - dedi Marat Qarabaev.