2024 jyldyń 29 qazanynda ál-Farabı atyndaǵy Qazaq ulttyq ýnıversıtetiniń shyǵystaný fakúlteti Túriktaný jáne Shyǵys elderiniń tarıhy kafedrasynda Qazaqstan jáne Túrkıa Respýblıkalarynyń Respýblıka kúnderine oraı «Respýblıkalar joly: tarıhtan bolashaqqa» atty merekelik shara ótti.
İs-sharany kafedranyń aǵa oqytýshysy, kýrator-edvaızer Jeńisbek Ákimbekuly Ábildaev pen «Jas zertteýshi» úıirmesiniń jyldyq jospary aıasynda «6B02207-SHyǵystaný» mamandyǵynyń 4-kýrs stýdentteri uıymdastyrdy. Merekelik sharaǵa fakúltettiń profesor-oqytýshy quramy, magıstranttar, doktoranttar, stýdentter jáne túrik bıznes ókilderi qatysty.
İs-shara eki mańyzdy kezeńge bólindi. Birinshi kezeń Qazaqstan men Túrkıa Respýblıkalarynyń ánurandaryn oryndaýmen bastalyp, stýdentter daıyndaǵan baıandamalarmen jalǵasty. 4-kýrs stýdentteri Muratova Albına men Úmit Iashar Oǵyzjan «Mustafa Kemaldy eske alǵanda» (túrikshe), Keńesova Aıajan «Zaýla, egemendik tulpary» (qazaqsha), Hakımbaeva Azıza «Respýblıka» (túrikshe) atty óleńderin oqydy. Aner Arlan baýyrlas eki eldiń respýblıka jolyndaǵy damý erekshelikterin beıneleıtin beınerolık daıyndasa, Muhıdın Gúldana «Qazaqstan men Túrkıa Respýblıkalarynyń táýelsizdik pen ulttyq birlik joly» taqyrybynda (qazaqsha-túrikshe) baıandama jasady.
İs-sharanyń ekinshi kezeńi halyqaralyq mansaptyq platformaǵa baǵyttaldy. Túrkıa Respýblıkasy Prezıdenti Apparatynyń Adam resýrstary ortalyǵynyń ókili Mert Tekbyıyk myrza 2024 jyldyń 2 qarashasynda InterContinental Almaty qonaqúıinde ótetin TALENTforBIZ kórmesi týraly tanystyrylym jasady. Bul shara Turkish Airlines, Ziraat Bank jáne Halkbank sıaqty bedeldi kompanıalardyń mansaptyq múmkindikteri týraly aqparat berdi. Qatysýshylar bolashaq mansaptary úshin kóptegen mańyzdy aqparat alyp, kórmege qatysýǵa tirkeýden ótti. Jastardyń osy baǵytta belsendi jumys isteıtinine senim bildirildi.
Merekelik shara sońynda Túriktaný jáne Shyǵys elderiniń tarıhy kafedrasynyń meńgerýshisi Myrzahan Sháripbaıuly Egamberdıev is-sharanyń joǵary deńgeıde ótkenin atap ótip, kelgen qonaqtar men stýdentterge, uıymdastyrýshylarǵa alǵys bildirdi. Sondaı-aq, bolashaqta kafedrada osyndaı sharalardyń kóptep uıymdastyrylatynyn aıtty.