Almatynyń Túrksib aýdanynda aýmaqtardy abattandyrý jumystary qarqyndy túrde jalǵasyp keledi. Aýdan turǵyndarynyń ıgiligi úshin birden birneshe jańa demalys aımaqtary – serýen aleıalarynan bastap sport alańdaryna deıin ashyldy. Bul týraly Túrksib aýdanynyń ákimdigi habarlady.
Jas Qanat shaǵynaýdanynda, Hasanǵalıuly kóshesinde, jaıly qoǵamdyq keńistik quryldy: asfált jáne trotýar tastary tóselip, kógal egildi, jaryqtandyrý men beınebaqylaý kameralary, pergolalar, oryndyqtar jáne qoqys jáshikteri ornatyldy. Endi munda turǵyndar taza aýada jaıly jaǵdaıda ýaqyt ótkize alady.
Sondaı-aq, Jas Qanat shaǵynaýdanynda (1/42 úı) balalar jáne sport alańy jańartyldy. Fýtbol alańy jóndelip, rezeńke jabyny aýystyryldy, jańa oıyn keshenderi, jattyǵý qurylǵylary, kóshe shamdary men qorshaýlar ornatyldy. Jańarǵan aýmaq aýdan balalary men jasóspirimderiniń súıikti demalys ornyna aınaldy.
Magnıtnaıa kóshesinde zamanaýı serýen aımaǵy abattandyryldy. Munda trotýar tas tóselip, oryndyqtar men qoqys jáshikteri, sándik pergolalar jáne sýarý júıesi ornatyldy. Bul aýmaq shaǵynaýdan turǵyndary úshin jańa jaıly serýen jáne demalys ornyna aınaldy.
Aımaýytov kóshesinde jaryqtandyrýy, oryndyqtary jáne sándik elementteri bar jaıaý júrginshiler aımaǵy paıda boldy.
Býlvar boıyn jas sýretshilerdiń qylqalamynan týǵan kartınalar kóriktendirip, keńistikke shyǵarmashylyq lep pen erekshe bolmys syılady.
«Árbir jańa aımaq – bul turǵyndar men qala qonaqtary belsendi demalyp, sportpen aınalysyp, ýaqytyn tıimdi ótkize alatyn jaıly, qaýipsiz jáne zamanaýı qalalyq ortany qalyptastyrý jolyndaǵy taǵy bir qadam», – dedi aýdan ákimdiginiń ókilderi.