Qazirgi kúnde ata-analardyń qazaq tiline dege qyzyǵýshylyǵy zor
Habar24-tiń jazýynsha, ol úshin Altaı Respýblıkasynyń Qosaǵash mektebiniń ustazdary arnaıy oqý-ádisteme ázirledi. Olar daıyndaǵan 1-4 synyptarǵa arnalǵan «Álippe» men «Qazaq tili»» oqýlyqtary saraptamadan ótti, dep habarlaıdy Almaty-akshamy.kz.
Altaıdaǵy Qosaǵash aýyly mektebiniń muǵalimderi qazaq tili páni boıynsha bastaýysh synyptarǵa arnalǵan oqý-ádistemelik keshenderin 2021 jyly ázirledi. Olar barlyq deńgeılerde saraptamadan ótip, endi reseılik oqý baǵdarlamasyna resmı túrde engizildi.
«Eger de biz fakúltatıv týraly aıtyp otyrsaq, barǵysy kelgen balalar barady, sabaqqa barǵysy kelmeıtin balalar barmaıdy. Sondyqtan tildi úırenbeıdi. Al pán bolsa, balalar mindetti túrde barady, sondyqtan tilderi damıdy, ana tilinde erkin sóıleıdi. Qazirgi kúnde ata-analardyń qazaq tiline dege qyzyǵýshylyǵy zor, sondyqtan balalaryn oqytýǵa tyrysady», - dedi qazaq tili muǵalimi Batken Sarsenova.
Omby qalasynyń 3 mektebiniń oqýshylary ana tilin fakúltatıvtik sabaq kezinde úırene alady. Al oblystyń 11 mektebi qazaq tilin mindetti pán retinde oqytady.
«Bizdiń jergilikti Omby qazaqtaryn dıaspora dep ataýǵa bolmaıdy, óıtkeni olar – osy aýmaqty ejelden mekendegen halyq. Bizdiń oblysta ulttyq mádenıetti saqtaý jáne nasıhattaý isine kóp kóńil bólinedi jáne jan-jaqty qoldaý kórsetiledi», - dedi Omby oblysy Óńirlik saıasat mınıstrliginiń sektor meńgerýshisi Rýstam Grasımchýk.
Omby jáne Altaı muǵalimderi jańa oqýlyqtar Reseıdiń basqa da mektepterinde qoljetimdi bolyp, qazaq tilin oqytatyn bilim berý mekemeler jelisi keńeıedi dep úmittenedi.