Qazir Reseı tarapy banan ósiretin qazaqstandyq kompanıanyń tájirıbesine qyzyǵýshylyq tanytyp otyr. Bul týraly Aýyl sharýashylyǵy vıse-mınıstri Azat Sultanov aıtty, dep habarlaıdy aqshamnews.kz.
Senat kýlýarynda mınıstrdiń orynbasaryna «Interfakste» «Reseı Qazaqstannyń banan ósirý tájirıbesine qyzyǵýshylyq tanytty» degen aqparat jarıalanǵanyn suraǵan. Osyǵan qatysty túsinik bere alasyz ba? Elimizde ósirilgen banan Ekvadordan jetkiziletin ónimnen arzan ba?» degen suraq qoıyldy.
Azat Sultanov qazirgi ýaqytta Túrkistan oblysynda banan ósirilip jatqanyn habarlady.
Bul ınvestısıalyq joba jylyna 1 myń tonna banan ósirýge múmkindik beredi, bul jalpy banan ımportynyń shamamen 1%-yn quraıdy. Qazir baǵa konúnktýrasy men jetkizý shyǵynyna baılanysty bul banannyń quny ishki naryqta básekege qabiletti bolyp tur. Sebebi, qazirgi tańda banan ósirip jatqan kompanıa barlyq partıany qaıda jetkizetinin anyqtap qoıǵan. Halyqqa ónim jetedi me, jetpeı me? Óıtkeni iri dúkender jelisi ónimdi iri kólemde satyp alýǵa qyzyǵýshylyq tanytýda, – dedi vıse-mınıstr.
Ol sondaı-aq, mundaı ónimdi óndirý úshin shyǵyndy da esepteý kerektigin atap ótti.
«Áriptesterińiz biz apelsın, banan jáne mandarındi qashan ósiremiz?» dep suraq qoıǵan. Mundaǵy másele – óndiristiń rentabeldiligine baılanysty. Ekvador men Brazılıadaǵy klımat ónimdi shyǵynsyz óndirýge múmkindik beredi. Al jylyjaıda elektr, jylý, tyńaıtqysh shyǵyny bar. Ósimdikti qorǵaý úshin arnaıy quraldar qajet. Bul da shyǵyndy talap etedi. Qazir bul joba rentabeldilikke shyǵa alady. Sondyqtan Reseı Federasıasy elimizdegi jeke kompanıanyń banan ósirý tájirıbesine qyzyǵýshylyq tanytty. Bul ónim naryqta básekege qabiletti bolyp tur, – dedi Azat Sultanov.
Sondaı-aq mınıstrdiń orynbasary Túrkistan oblysy men batysta záıtún aǵashtaryn ósirý josparlary baryn aıtty.
«Biz tájirıbe júrgizdik. Nátıje jaqsy. Sondyqtan birtindep osyndaı biregeı jobalardy iske asyramyz. Otandyq óndirýshiler dástúrli jetkizýshilermen básekege túse alatyn bolady», – dedi ol.