Reseıdiń Omby qalasynda etnıkalyq qazaqtar sany artyp keledi.
Osyǵan oraı kórshi eldegi birneshe mektepterde qazaq tili fakúltatıvtik pán retinde oqytylýda. Aldaǵy ýaqytta mektepterde kásibı bilim berýge qabiletti joǵary bilikti muǵalimderdi oqytý úshin qazaq jáne orys tili muǵalimderin daıarlaý baǵdarlamasy júzege aspaq, dep habarlaıdy almaty-akshamy.kz.
Bul týraly Ózbekáli Jánibekov atyndaǵy OQPÝ-ne Reseıdiń OMSK pedagogıkalyq ýnıversıtetinen kelgen resmı ókilder málimdedi. Atap aıtqanda, Omsk memlekettik pedagogıkalyq ýnıversıtetiniń Ǵylymı jumystar jónindegi prorektory, ekonomıka ǵylymdarynyń doktory, dosent Irına Gerashenko, Halyqaralyq yntymaqtastyq bóliminiń basshysy Lúdmıla Bevzúk, Orys tili kafedrasynyń meńgerýshisi Evgenıı Vıdanov, Arkadıı Petrýsevıch.
Reseılik ǵalymdardy ýnıversıtet Basqarma tóraǵasy-rektor Gúljan Súgirbaeva qabyldap, áriptes JOO-men yntymaqtastyq kelisimshartty jańartý, akademıalyq utqyrlyq, taǵylymdama jáne halyqaralyq baǵdarlamalar men jobalar, ǵylymı-zertteý jumystary máselelerin talqylady.
Ýnıversıtettiń akademıalyq máseleleri jónindegi prorektory A.Qudysheva, kafedra meńgerýshileri D.Baıǵutova men E.Orynbetovaǵa áriptes JOO-nyń orys tili kafedrasynyń meńgerýshisi E.Vıdanov, A. Petrýsevıchpen birge jańa jobany júzege asyrýǵa baılanysty birshama mindetter júkteldi.
Búginde OQPÝ joǵary bilim men ǵylymdy ınternasıonaldandyrý saıasatyn qarqyndy júzege asyrýda. Ýnıversıtet álemniń túrli geografıalyq aımaqtarynyń, atap aıtqanda, Eýropalyq odaqtyń, Shyǵys jáne Ońtústik-SHyǵys Azıa, TMD elderiniń 100-den astam joǵary bilim berý jáne zertteý uıymdarymen yntymaqtastyq týraly memorandýmdar men halyqaralyq kelisimderge qol qoıǵan.