Sıfrlyq format múmkindigi
Qyzylordada patrúldik polısıa qyzmetkerleri mas adamdy ustady. Planshettiń kómegimen onyń halyqaralyq izdeýde ekeni anyqtalǵan, dep Almaty-akshamy.kz habarlaıdy BAQ.KZ-ke silteme jasap.
Profılaktıkalyq is-sharalar barysynda Qyzylorda qalasy PB patrúldik polısıa batalónynyń qyzmetkerleri №2 ákimshilik aımaqtaǵy Toqmaǵambetov kóshesi boıynda 32 jastaǵy mas adamdy ustady. Medısınalyq tekserýden ótý úshin ol narkologıalyq dıspanserge jetkizilgen. Derekterdi anyqtaý kezinde elektrondyq planshet arqyly quqyq buzýshy osy jyldyń mamyr aıynda urlyq jasaǵany úshin halyqaralyq izdeýge jarıalanǵany jáne tórt aı boıy polısıadan qashyp júrgeni belgili boldy.
Alaıda suraq qoıý barysynda óziniń izdeýde júrgenin bile tura, polısıaǵa ózi týraly jalǵan aqparat berip, aty-jónin ózgertip aıtqan.
«Jumystyń servıstik tásilderi engizilgennen keıin qujat aınalymynyń basym bóligi sıfrlyq formatqa kóshirildi. Búgingi tańda planshet qurylǵylaryn paıdalaný jaqsy nátıje berýde. Onda barlyq derekter, kólik quraldaryna qoıylatyn shekteýler, izdeýde júrgen azamattar týraly aqparattar bar. Al baǵyt-baǵdarlar planshetterge avtomatty túrde túsip, málimetter elektrondy format bazasynda bolady. Biriktirilgen derekter birden respýblıkalyq bazaǵa túsedi», – dep atap ótti Qyzylorda oblysy PD bastyǵy Muhtar Qojabaev.
Qazirgi ýaqytta ustalǵan kúdiktige qatysty kúzetpen ustaý túrindegi bultartpaý sharasy tańdaldy. Ol ýaqytsha ustaý ızolátoryna qamalyp, basqa da osy tektes qylmystarǵa qatystylyǵy tekserilýde.