Qylmystyq jaýapkershilikke tartylady
Taldyqorǵanda polısıa ǵımaratyna bomba qoıylǵany týraly jalǵan aqparat bergen er adam ustaldy, dep habarlaıdy Almaty-akshamy.kz Polisia.kz saıtyna silteme jasap.
«16 tamyz kúni Taldyqorǵannyń «102» shuǵyl jelisine oblystyq Polısıa departamentiniń ǵımaratyna jarylǵysh zat qoıylǵany týraly habarlama tústi. Dabyl boıynsha áreket etken saperler, kınologtar jáne ártúrli mamandar barlyq bólmelerdi, sonymen qatar jaqyn ornalasqan aýmaqty tekserdi. Habarlama jalǵan bolyp shyqty.
Osy aralyqta jedel bólimshelerdiń qyzmetkerleri jalǵan terrorısti shuǵyl anyqtap, ustap, ony qalalyq polısıaǵa jetkizdi», - delingen polısıa málimetinde.
Ustalǵan kúdikti Taldyqorǵan qalasynyń 44 jastaǵy turǵyny. Ol jasaǵan isine ókinetinin aıtyp, qala turǵyndarynan mundaı ázili úshin keshirim surady.
«Mas bolyp, bomba týraly habarladym. Mas kúıimdegi áreketim úshin zań aldynda jaýap berýim kerek», – dedi ustalǵan er adam.
Polıseıler terorızm aktisi týraly kórineý jalǵan habarlaǵandar qylmystyq jaýapkershilikke tartylatynyn eske salady. Qoldanystaǵy zańnamada iri kólemde aqshalaı aıyppul, bas bostandyǵyn shekteý nemese bes jylǵa deıin bostandyǵynan aıyrý túrindegi jaza kózdelgen.