Bıyl Qazaqstan Respýblıkasy Sý resýrstary jáne ırrıgasıa mınıstrligi Qyzylaǵash sý qoımasyn qaıta jańǵyrtý jumystaryn sátti aıaqtady.
Jobanyń aıasynda sý tasqyny kezinde artyq sýdy jiberýge arnalǵan arna nyǵaıtylyp, jańa sý qabyldaý toraptary salyndy,- dep habarlaıdy Aqshamnews.kz
Jańǵyrtý nátıjesinde nysanǵa zamanaýı baqylaý dachıkteri, avtomattandyrylǵan monıtorıń júıesi jáne jergilikti habarlandyrý júıesi ornatyldy. Syıymdylyǵy 42,6 mıllıon tekshe metr bolatyn qoıma endi 6 680 gektar egistik alqabyn turaqty túrde sýmen qamtamasyz ete alady.
Sala mamandarynyń aıtýynsha, bul joba óńirdegi aýyl sharýashylyǵynyń damýyna oń yqpal etip qana qoımaı, tótenshe jaǵdaılardyń aldyn alýǵa da septigin tıgizedi.
«Memleket basshysy elimizdiń sý sharýashylyǵy ınfraqurylymyn jańǵyrtýdy tapsyrǵan bolatyn. Osy baǵytta 2023 jyly gıdrotehnıkalyq nysandardy túgendeý júrgizilip, nátıjesinde sý salasyn damytýdyń keshendi jospary ázirlendi. Bul jospar 160-tan astam is-sharany qamtıdy, onyń ishinde 42 jańa sý qoımasyn salý jáne 37 qoldanystaǵy nysandy rekonstrýksıalaý qarastyrylǵan. Qyzylaǵash sý qoımasyn jańǵyrtý — osy keshendi jumystyń mańyzdy bóligi. Bul joba Jetisý oblysynyń aýyl sharýashylyǵyna serpin berip, turǵyndardy sý tasqyny qaterinen qorǵaýǵa múmkindik beredi», — dedi Sý resýrstary jáne ırrıgasıa vıse-mınıstri Erbolat Ibraıhanov.
Qaıta jańǵyrtý jumystary — elimizdegi sý resýrstaryn tıimdi paıdalaný men aýyl sharýashylyǵyn turaqty damytý jolyndaǵy mańyzdy qadamdardyń biri. Aldaǵy ýaqytta mınıstrlik sý ınfraqurylymyn jańartý jumystaryn jalǵastyrýdy josparlap otyr.