Jyl saıyn tamyz-qyrkúıek aılarynda bazar sórelerí tolyp, ár úıde qysqy azyqqa daıyndyq bastalady. Ásírese qazaq áıelderí ádetten taımaı, qıyar tūzdap, salat jabu dástúrín jalǵaıdy. Dese de, ár mausymnyń kókónísterí aua raıyna qaraı ár túrlí qūrammen ósíp shyǵady. Bıyl qıyar jabuǵa daıyndalyp jatqan jūrt není bílu kerek? Jıí jíberetín qatelíkter qandaı? Aqshamnews.kz tílshísí kerek keńesterdí tízdí.
Qıyar baǵasy qanshadan bolyp jatyr?
2025 jylǵy qyrkúıekte qıyar baǵasy aımaqtarǵa qaraı ártúrlí saudalanyp jatyr.
Almaty qalasynda – 400–500 teńge/kg,
Astana – 450–600 teńge/kg,
Shymkent, Túrkístan, Taraz sıyaqty ońtústík óńírlerde – 350–450 teńge/kg,
Auyldyq jerlerde - baǵasy kelísím boıynsha, keı jerde 300 teńgege deıín túsedí.
Tańdau kezínde qıyardyń kólemíne, qattylyǵyna jáne syrtqy túríne nazar audaru kerek. Konservíleuge arnalǵan eń jaqsy qıyar - ūsaq, tyǵyz árí bírkelkí pískenderí. Úlken nemese íshí bosap qalǵan qıyarlar saqtau barysynda jūmsaryp ketuí múmkín.
Není eskeru kerek?
Qıyar jabu - tek kókónístí salyp, tūzdyq qūyu emes. Būl - naqty proportsıya men gıgıenany talap etetín tehnologıyalyq protsess.
Bankalar men qaqpaqtardy zararsyzdandyru - basty qadam. Qaınaǵan suǵa kem degende 10 mınut salyp nemese buǵa ūstap zararsyzdandyru qajet.
Qıyardy aldyn ala 2–3 saǵatqa suyq suǵa salyp qoısańyz qıyar qytyrlaq árí balǵyn qalpyn saqtaıdy.
Tūzdyq qūramy (orta eseppen):
- 1 lıtr su
- 2 as qasyq qant,
- 1 as qasyq tūz,
- 1 shaı qasyq 70% sírke suy qosylady.
Aspırınníń ornyna ne qoldanuǵa bolady?
Keı retseptterde aspırın konservant retínde paıdalanylady. Alaıda ony qoldanuǵa qarsy píkírler de bar, sebebí būl dárí taǵamdyq maqsatta emes.
Alternatıva retínde 70% sírke suy – eń keń taralǵan konservant. Dūrys mólsherde qosylsa, dámín būzbaıdy. Lımon qyshqyly – dámí jūmsaq, tabıǵı balama. Qysha dání, qaraqat, shıe nemese emen japyraǵy – tabıǵı antıseptık. Qıyardy qatty árí qytyrlaq ūstap tūrady.
Bankam "bomba" bolmasyn deseńíz...
Qysqa daıyndaǵan bankíníń "atylyp ketuí" – qıyar jabumen aınalysatyn kez kelgen jannyń basynan ótetín jaǵdaı. Būl bankíníń íshíndegí qysym men sterıldík erejeleríníń būzyluynan bolady.
- Bankíní jáne qaqpaqty tolyqtaı zararsyzdandyru: qaınatu nemese buǵa ūstau arqyly bankí men qaqpaqtan bakterıyalardy joyu – eń mańyzdy qadam. Kóptegen qatelíkter osy kezeńdí eskermeuden bastalady.
- Qıyardy aldyn ala suǵa salyp qoyu: 2–3 saǵat salqyn suda tūrǵan qıyar tabıǵı kúıíne kelíp, serpímdí bolady. Būl onyń bankí íshínde jūmsaryp ketuíníń aldyn alady;
- Qaınaǵan tūzdyqty ǵana paıdalanu: tūzdyq míndettí túrde qaınap tūruy tıís. Jyly nemese salqyn tūzdyq kókónístíń betín zararsyzdandyra almaıdy.
- Bankíní japqannan keıín 12–24 saǵat íshínde tóńkeríp, kórpemen orau: būl íshkí qysym men temperaturany teńestíríp, "atylu" qaupín azaıtady.
- Saqtau aldynda bankídegí sūıyqtyq deńgeıín tekseru: qıyar tūzdyqtyń astynda tolyq tūruy kerek. Joǵary shyqqan qıyar bólíkterí shíríp, búkíl bankíní būzady.