QR Ónerkásip jáne qurylys mınıstrligi aıaq kıimdi sıfrlyq tańbalaý boıynsha ókiletti organy retinde Biryńǵaı operatormen birlesip aıaq kıim óndirýshilermen jáne iri logıstıkalyq kompanıalarmen taýardy tańbalaý máseleleri boıynsha kelissózder ótkizdi.
Kezdesý barysynda Beijing Vitcony kompanıasynyń basshylyǵy tegin tańbalaý qyzmet kórsetýge daıyn ekenin aıtty, dep habarlaıdy almaty-akshamy.kz.
«Sizdiń kásipkerlerińiz barlyq derekterdi engizýimiz úshin japsyrmada bolýy kerek aqparatty PDF formatynda jiberýi tıis. Osydan keıin biz búkil prosedýrany oryndaımyz. Klıent tek jetkizý qyzmetterin úshin tóleýi kerek. Bul túpkilikti baǵaǵa áser etpeıdi. Biz seriktesterimizdiń bizden tek joǵary sapaly qyzmet alýy úshin qoldan kelgenniń bárin jasaımyz», - dedi Faına Tanádasha, Beijing Vitcony bas dırektory.
Saraptama nátıjesinde qytaılyq óndirýshiler - aıaq kıim tigý boıynsha iri fabrıkalar basqa da kórshi elder aýmaǵyna eksporttalatyn taýarlar boıynsha tańbalaý qyzmetin qazirdiń ózinde júzege asyryp jatqany anyqtaldy. Tıisinshe, barlyq bıznes-prosester testitleýden ótip, júzege asyrylyp, birneshe ret synaqtan ótken jáne Qazaqstan Respýblıkasynyń aýmaǵyna aıaq kıim ónimderin ımporttaý barysynda qoldanylýǵa daıyn.
Sonymen qatar, eksportqa shyǵatyn júkterdi «jınaý jáne toptaý pýnktteri» bolyp tabylatyn iri transshekaralyq toraptar reseılik jáne qazaqstandyq ımporttaýshylarǵa aıaq kıim ónimderin tańbalaý qyzmetin kórsetýde. Bul prosedýranyń quny bir jup aıaq kıim úshin 0,2-den 0,5 ıýánǵa (13-33 teńge) deıin jetedi, keıde atalmysh rásim júk kólemine jáne taýar ıesimen jasalǵan kelisimderge baılanysty qosymsha tólemsiz jalpy keshendi qyzmet retinde beriledi.
«Baby sky» brendiniń ókilderi de tegin yntymaqtastyqqa daıyn ekendikterin jetkizdi. Taýarlardyń úlken kólemin eksporttaıtyn bolsa, olar arnaıy kodty jabystyrýǵa jumsalatyn barlyq shyǵyndaryn ózderi kóterýge daıyn. Aıta keterligi, qytaılyq óndirýshiler qazaqstandyq aıaq kıim naryǵynyń jalpy kóleminiń 70 paıyzyn qamtıdy.
Aıta ketý kerek, mindetti tańbalaý engizilgennen beri Qazaqstanǵa aıaq kıimniń resmı ımporty salystyrmaly túrde aıtqanda 2019 jylǵy 39,5 mıllıon jup bolsa, 2021 jyly 53,1 mıllıon jupqa jetip, 34 paıyzǵa ósken. Al 2022 jyldyń 7 aıynda 26,1 mıllıon aıaq kıim mindetti tańbalansa, 2023 jyly 35,6 mln. jupqa jetken. Demek, 36 paıyzǵa óskendigin baıqaýǵa bolady.