2023 jyldyń 9 aıynyń qorytyndysy boıynsha Qazaqstan men Germanıa arasyndaǵy AÓK ónimderiniń taýar aınalymy 94 mln dollardy quraǵan.
Qazaqstannan Germanıaǵa eksport kólemi 23,5 mln dollardy, Germanıadan Qazaqstanǵa ımport kólemi 70,3 mln dollarǵa jetti, dep habarlaıdy almaty-akshamy.kz salalyq mınıstrlikke silteme jasap.
Eki eldiń qarym-qatynastaryn nyǵaıtý úshin 2023 jyldyń 15-17 qarashasynda QR Premer-mınıstriniń birinshi orynbasary Roman Sklár bastaǵan qazaqstandyq delegasıa Berlınge issaparmen bardy. Onda QR Aýyl sharýashylyǵy vıse-mınıstri Ábilhaıyr Tamabek GFR Aýyl sharýashylyǵy jáne azyq-túlik federaldyq mınıstri janyndaǵy stats-hatshy doktor O.Nıkpen kezdesti.
Kezdesýde vıse-mınıstr Qazaqstan men Germanıa yntymaqtastyǵynyń basym baǵyttary – tuqym sharýashylyǵy, ósimdikterdi qorǵaý, sıfrlyq eginshilik jáne aýyl sharýashylyǵy ınovasıalary ekenin atap ótti. Mysaly, ótken jyly Qazaqstan PETKUS Technologie GmbH kompanıasymen yntymaqtastyq týraly memorandýmǵa qol qoıdy, ol otandyq fermerlerge seleksıalyq jáne tuqym ósirý tehnıkasyn jeńildikpen alýǵa múmkindik berdi.
Sondaı-aq, tuqym sharýashylyǵyndaǵy zamanaýı tehnologıalar boıynsha qazaqstandyq mamandarǵa konsýltasıalyq qoldaý kórsetý jáne birlesken oqytý semınarlaryn ótkizý týraly ýaǵdalastyqqa qol jetkizildi. Qazaqstanda aýyl sharýashylyǵyn damytýǵa Soltústik Qazaqstan oblysynda KLAAS kompanıasynyń zaýytyn iske qosý úlken serpin berdi. Jaqyn arada zaýyt janynan kolej stýdentteri men jas mamandardy dýaldi oqytý qaǵıdaty boıynsha KLAAS tehnıkalaryn jóndeýge jáne tehnıkalyq qyzmet kórsetýge oqytý úshin quzyrettilik ortalyǵyn ashý josparlanǵan. Ábilhaıyr Tamabek qazirdiń ózinde kóptegen german kompanıalary Qazaqstandaǵy óz oqý ortalyqtary arqyly kásibı-tehnıkalyq kadrlardy oqytýǵa eleýli úles qosyp kele jatqanyn atap ótti.
««Agrarlyq-saıası dıalog» (ASD), «Nemis agrarlyq ortalyǵy» jáne «Qazaqstannyń sút óndirý salasyndaǵy quzyrettilikti arttyrý» sıaqty ekijaqty kooperasıalyq jobalar aıasyndaǵy yntymaqtastyq joǵary deńgeıde iske asyrylyp kele jatqanyn atap ótkim keledi. Jumys istep turǵan ortalyqtar men jobalardyń qyzmetin eki tarap ta oń baǵalaıdy jáne AÓK salasyndaǵy qazaqstan-german yntymaqtastyǵyn damytýǵa eleýli úles qosady», - dedi vıse-mınıstr.
Onyń aıtýynsha, qazaqstandyq delegasıa 2024 jyldyń 19-28 qańtarynda Berlınde ótetin 88-shi aýyl sharýashylyǵy halyqaralyq «Jasyl apta 2023» kórmesine qatysady.
Qazaqstan men Germanıa ókilderiniń kezdesý qorytyndysy boıynsha GFR Federaldyq azyq-túlik jáne aýyl sharýashylyǵy mınıstrligi men QR Aýyl sharýashylyǵy mınıstrligi arasynda «Germanıa-Qazaqstan agrarlyq-saıası dıalogy» ekijaqty kooperasıalyq jobasy aıasynda yntymaqtastyqty odan ári damytý jáne tereńdetý týraly birlesken málimdemege qol qoıdy.
Sonymen qatar, Ábilhaıyr Tamabek Germanıa Agrobıznes Alánsynyń dırektory doktor Per Broderzenmen kelissóz júrgizdi. Taraptar tuqym men tyńaıtqysh óndirisine qatysty máselelerdi talqylady. Kezdesý sońynda Alánspen memorandýmǵa qol qoıyldy.