Shyǵys jáne Ońtústik Qytaıdyń jaǵalaý aımaqtarynda daýyldyń maksımaldy «qyzyl deńgeıi» jarıalandy.
Sebebi juma kúni «Doksýrı» qýatty taıfýny tónedi dep kútiledi. Bul týraly Qytaıdyń Ortalyq meteorologıa qyzmeti málim etti, dep habarlaıdy Almaty-akshamy.kz.
Meteorologıalyq boljamdarǵa sáıkes, «Doksýrı» taıfýny materıktik Qytaıǵa bet buryp, soltústik-batys baǵytta jyljyp, Fýszán, Gýandýn, Chjeszán, Anhoı, Szánsı jáne basqa da provınsıalarǵa áser etedi.
27 shilde tańǵy saǵat 06:00-degi jaǵdaı boıynsha, taıfýn Taıvan aralynyń ońtústik shetinen 220 shaqyrymdaı jerde bolyp, soltústik-batysqa qaraı 10-15 km/saǵ jyldamdyqpen jyljyp keledi.
Taıfýn juma kúni tańerteń Fýszán jáne Gýandýn provınsıalarynyń jaǵalaý aımaqtaryna jetedi dep kútilýde.
Meteorologtardyń boljamynsha, taıfýnnyń qarqyndylyǵy materıktik Qytaıǵa jaqyndaǵan saıyn arta túsedi, osy ýaqytqa deıin onyń ortalyq bóligindegi jeldiń jyldamdyǵy 52 m/s jetken.
QHR tótenshe jaǵdaılardy basqarý mınıstrligi qazirgi ýaqytta joǵary daıyndyq jaǵdaıynda turǵan 4 myńnan astam adam men tehnıkany jumyldyrdy. Bılik turǵyndarǵa sý tasqyny men kóshkin qaýpi týraly eskertti.