2024-2025 akademıalyq oqý jylyna arnalǵan úkimetaralyq granttar sheńberinde Qytaıdyń jetekshi joǵary oqý oryndarynda oqýǵa arnalǵan qazaqstandyqtardyń sońǵy tizimi jarıalandy, dep habarlaıdy aqshamnews.kz.
Ǵylym jáne joǵary bilim mınıstrliginiń málimetinshe, 151 úmitkerge stıpendıa taǵaıyndaý týraly sońǵy sheshimdi qabyldaýshy tarap – Qytaı Halyq Respýblıkasy qabyldady.
Esterińizge sala keteıik, qazaqstandyq tarap buǵan deıin QHR jetekshi joǵary oqý oryndarynda bakalavrıat, magıstratýra jáne doktorantýra baǵdarlamalary boıynsha oqýǵa 326 úmitkerdi usynǵan bolatyn. Grant akademıalyq oqý, jataqhanada turý, medısınalyq saqtandyrý shyǵyndaryn óteıdi, sonymen qatar stýdentterge aı saıyn stıpendıa tólenedi. Oqý aǵylshyn nemese qytaı tilinde ótedi. Usynylǵan úmitkerler tizimimen «Halyqaralyq baǵdarlamalar ortalyǵy» AQ bolashak.gov.kz saıtynda tanysýǵa bolady.
Eger siz oqýǵa arnalǵan stıpendıattar tiziminde bolsańyz, onda 60 kúntizbelik kún ishinde oqýǵa shart jasasý úshin «Halyqaralyq baǵdarlamalar ortalyǵy» AQ-ǵa júginýińiz qajet. Shart jasasý úshin saıttyń (bolashak.gov.kz) basty betinde kezekti brondaý qajet jáne ózińizben birge jeke kýáliktiń túpnusqasyn alyp kelińiz.
Eger shart jasasý kezinde jeke qatysa almasańyz, onda notarıaldy kýálandyrylǵan senimhat boıynsha úshinshi tulǵa siz úshin shart jasasa alady.
Bul jaǵdaıda úshinshi tulǵada sizdiń jeke kýáligińizdiń kóshirmesi, senimhattyń túpnusqasy jáne jeke kýáliktiń túpnusqasy bolýy qajet. Shart jasasý boıynsha egjeı-tegjeıli keńes alý úshin normatıvtik quqyqtyq jáne sharttyq qamtamasyz etý basqarmasyna
8-7172-76 90 79 (ishki.170,181) habarlasa alasyz.