Bul - eldegi eń uzaq lokdaýn.
Jeksenbi kúni keshke Shanhaıda júzdegen demonstrant aıqaılap, polısıamen tóbelesti. Osylaısha, eldiń qıyr batysyndaǵy páterdegi órtten keıin bastalǵan qatań shekteýlerge qarsy sherýler úshinshi kúnge ulasyp otyr, dep habarlaıdy Almaty-akshamy.kz Inbusiness.kz silteme jasap.
Beıjińdi qosa alǵanda, basqa qalalarǵa da taraǵan azamattyq baǵynbaý aksıalary materıktik Qytaıda on jyl buryn Sı Szınpın bılikke kelgennen beri múlde bolmaǵan jaǵdaı jáne de demonstrasıalar Sıdiń "nól-kovıd" saıasatynan halyq túńile bastaǵan shaqta ótip jatyr. Aıta ketsek, Qytaı úsh jylǵa jýyq ýaqytyn álemdegi eń qatań karantındik shekteýlermen ótkizdi.
Úrimshi qalasyndaǵy kóp qabatty turǵyn úıdegi órtten adamdar lokdaýn kesirinen qaza tapty degen beınematerıal áleýmettik jelide jarıalanǵany sol-aq eken, elde narazylyq bastaldy. Alaıda Úrimshi sheneýnikteri senbi kúni tańerteń kenetten baspasóz máslıhatyn ótkizip, COVID-ke qarsy sharalar adamdardyń órtten qashýyna nemese olardy tilsiz jaýdan qutqarýǵa kedergi keltirgenin joqqa shyǵardy.
Úrimshiniń 4 mıllıon turǵynynyń kópshiligine 100 kúnge deıin úılerinen shyǵýǵa tyıym salynǵan. Bul - eldegi eń uzaq lokdaýn. Osynda turatyn uıǵyr áıel AR agenttigine bergen suhbatynda tamyzdyń 8-inen úıinen dalaǵa shyqpaǵanyna, tipti terezesin ashýǵa tyıym salynǵanyna shaǵymdandy.
Internet qoldanýshylary qytaılyq jáne sheteldik áleýmettik jelilerde jarıalaǵan vıdeolarǵa júginsek, karantınge qarsy sherýler Shanhaıdan bólek, Nankın, Chendý jáne ońtústik-batystaǵy Chýnsın men Shyńjańdaǵy Úrimshi, Qorla qalalarynda da ótip, olardyń keıbirine myńdaǵan adam qatysyp, "Komýnıstik partıa joıylsyn!", "Sı Szınpın ketsin!" degen urandar kóterilgen.