Vadım Kýrales máre syzyǵyn birinshi bolyp qıdy.
Qazaqstandyq bıatlonshy Vadım Kýrales Leık-Plesıd (AQSH) qalasynda ótip jatqan Qysqy Ýnıversıadanyń chempıony atandy, dep habarlaıdy Almaty-akshamy.kz QazAqparatqa silteme jasap.
Vadım Kýrales 15 shaqyrym qashyqtyqta jekeleı synda máre syzyǵyn birinshi bolyp qıdy.
Jarys jolyna 16-ynshy bolyp shyqqan Vadım nysana kózdeýden bir ret qana (0+1+0+0) múlt ketip, 42:37.4 mınýt nátıje kórsetti.
Norvegıalyq bıatlonshy Erán Moseng qazaqstandyqtan 42,6 sekýndqa qalyp qoıyp, ekinshi orynǵa ıe boldy. Fransıalyq Aksel Garne (+1:16.5) úzdik úshtikti túıindedi.
Qazaqstandyqtardan búgin sondaı-aq Aleksandr Mýhın, Kırıll Baýer jáne Bekentaı Turlybekov osy qashyqtyqta synǵa túskenimen, olar júldege ilige almady.
Osylaısha, Qazaqstan qorjynyna alǵashqy júlde – altyn medal tústi.