Qyrǵyzstan Prezıdenti Sadyr Japarov elde balalarǵa, qyzdarǵa jáne áıelderge qarsy asa aýyr qylmystar úshin eń qatań jaza qarastyratyn zańnamalyq ózgerister ázirleýdi tapsyrdy, - dep habarlaıdy Aqshamnews.kz tilshisi. Bul týraly memleket basshysynyń baspasóz hatshysy Askat Alagozov Facebook paraqshasynda habarlady.
Ol asa aýyr qylmystarǵa ólim jazasyn engizýdi tapsyrdy.
"Prezıdent zańnamany qaıta qarap, balalarǵa, qyzdarǵa jáne áıelderge qarsy qylmystar úshin eń aýyr jaýapkershilikti engizýdi tapsyrdy. Ásirese balalardy zorlaǵany jáne áıelderdi zorlap óltirgeni úshin ólim jazasyn qarastyrýdy júktedi", - dedi Alagózov.
Bul sheshim Qyrǵyzstandy dúr silkindirgen 17 jastaǵy Aısulýdyń asa qatigezdikpen óltirilýine baılanysty qabyldandy. Sadyr Japarov qylmystyq istiń tergeýin jeke baqylaýyna alǵany aıtyldy.
Aısulýdyń ólimi
27 qyrkúıekte Ystyqkól óńirinde 17 jastaǵy Aısulý joǵalyp ketken. Ol qurbysyna qonaqqa bara jatqan, biraq baılanysqa shyqpaı qalǵan. 29 qyrkúıekte onyń denesi Boom shatqalynan tabyldy.
Oqıǵaǵa baılanysty 41 jastaǵy Bishkek turǵyny kúdikpen ustaldy. Tergeý derekterine saı, ol boıjetkendi urlap, zorlap, óltirgenin moıyndaǵan. Aldymen denesin Ystyqkól jaǵasyna kómip, keıin qaıta qazyp alyp, Boom shatqalyna tastaǵany anyqtaldy. Kúdikti buǵan deıin de jynystyq sıpattaǵy qylmysy úshin jaýapqa tartylǵanymen, jazadan qutylyp ketken.
Ólim jazasy týraly tarıhı derek
Qyrǵyzstanda sońǵy ret ólim jazasy 1998 jyly oryndalǵan. 2007 jyly ólim jazasy zań júzinde joıylyp, 2010 jyly el BUU-nyń ólim jazasyn joıýǵa baǵyttalǵan Halyqaralyq paktiniń ekinshi fakúltatıvti hattamasyn ratıfıkasıalaǵan bolatyn.