Bul týraly qujatt endi Senattyń qaraýyna engiziledi.
Búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine qylmystyq jolmen alynǵan kiristerdi zańdastyrýǵa (jylystatýǵa) jáne terorızmdi qarjylandyrýǵa qarsy is-qımyl máseleleri boıynsha ózgerister men tolyqtyrýlar engizý týraly» zań jobasy ekinshi oqylymda maquldandy, dep habarlaıdy Almaty-akshamy.kz
Zań jobasy kiristerdi jylystatýǵa jáne terorızmdi qarjylandyrýǵa qarsy is-qımyldyń ulttyq júıesin jaqsartý, sondaı-aq aqshany jylystatýǵa qarsy kúrestiń qarjylyq sharalaryn ázirleý tobynyń halyqaralyq standarttaryn iske asyrý maqsattarynda ázirlendi.
Qujat zańdy tulǵalardyń benefısıarlyq menshik ıelerin ashý mindetin belgileýge, kiristerdi jylystatýǵa qarsy is-qımyl týraly zańnamany shet memlekettiń zańnamasyna sáıkes qurylǵan trasttarǵa nemese basqa da korporatıvtik qurylymdarǵa qoldanýǵa baǵyttalǵan. Sonymen qatar zań jobasynda terorızmdi jáne ekstremızmdi qarjylandyrýmen baılanysty uıymdar men tulǵalardyń tizbesine, sondaı-aq jappaı qyryp-joıý qarýyn taratýdy qarjylandyrýmen baılanysty uıymdar men tulǵalardyń tizbesine engizilgen sýbektilerdiń tikeleı nemese janama baqylaýyndaǵy qarajat pen ózge de aktıvterdi toqtatý eskerilgen.
Qujat aıasynda qylmystyq jolmen alynǵan qarajatty zańdastyrǵany úshin qylmystyq jaýapkershilikti kúsheıtý jáne FATF usynymdarynda aıqyndalǵan birqatar qylmystyq quqyqbuzýshylyqtar úshin «múlikti tárkileý» túrindegi qylmystyq jazany belgileý qarastyrylǵan.
Munymen qosa, zań jobasy «terorıstik áreket» uǵymyn keńeıtý maqsatynda «Terorızmge qarsy is-qımyl týraly» zańnyń erejesin Qylmystyq kodekstiń erejelerine sáıkes keltirýge baǵyttalǵan. Palatanyń jalpy otyrysynda «Ákimshilik quqyq buzýshylyq týraly kodekske qylmystyq jolmen alynǵan kiristerdi zańdastyrýǵa (jylystatýǵa) jáne terorızmdi qarjylandyrýǵa qarsy is-qımyl máseleleri boıynsha ózgerister men tolyqtyrýlar engizý týraly» ilespe zań jobasy da ekinshi oqylymda maquldandy.