Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly musylman qaýymyn Qurban aıt merekesimen quttyqtady, - dep habarlaıdy aqshamnews.kz.
"Asa qamqor erekshe meıirimdi Allanyń atymen bastaımyn! Barlyq maqtaý Allaǵa tán. Ardaqty Paıǵambarymyz Muhammedke Allanyń salaýaty men sálemi bolsyn! Barshańyzdy ısi musylman balasynyń ulyq meıramy – Qurban aıtpen shyn júrekten quttyqtaımyn! Sizderge Alladan amandyq, myqty densaýlyq, mol yrys pen baq-bereke tileımin! Shyn máninde, Qurban aıt – jalań qurbandyq emes, ol – ishki jan-dúnıeńdi tazartý men rýhanı turǵydan jańǵyrý degen sóz. Rasynda "qurban" sózi "jaqyn bolý", "jaqyndaý" degen uǵymdy bildiredi. Bul – shynaıy nıet pen Allaǵa degen súıispenshilikti pash etetin meıram. Ulyq merekeniń tárbıelik máni men maǵynasy osynda jatyr.
Qasıetti Quranda "Haj" súresiniń 37-aıatynda: "Umytpańdar, olardyń eti de, qany da eshqashan Allaǵa jetpeıdi. Oǵan jetetin nárse – júrekterińizge uıalaǵan taqýalyqtaryń (shynaıy nıetteriń)" delingen. Al ardaqty Paıǵambarymyz Muhammed (oǵan Allanyń salaýaty men sálemi bolsyn): "Adam balasy Qurban aıt kúni qurban shalýdan ózge amalymen Allaǵa jaqyndaǵan emes..." dep, bul kúnderi Allaǵa unamdy ári eń súıikti amal – qurban shalý ekenin jetkizgen. Materıaldyq múmkindigi bar, ári jolaýshy emes musylmanǵa qurbandyq shalý – ýájip (mindet). Al shamasy kelmegen adamǵa Alla Taǵala mundaı mindet júktemeıdi. Aıt kúnderi az da bolsa sadaqa berip, qaraýsyz qalǵan qarttarǵa, jetimder men kópbalaly otbasylarǵa kóńil bólý – saýapty is", - dedi Bas múftı óz quttyqtaýynda.
Naýryzbaı qajy Taǵanuly Qurban aıt qurban shalýmen shektelmeıtinin aıtyp, saýapty ıgi isterdi atady.
"Bul – aǵaıyn arasyn jaqyndata túsetin kún. Arazdasqan adamdar tatýlasyp, ózara keshirim jolyn ustanady. Aıt kúnderi týysqannyń basyn qosyp, qarym-qatynasty kúsheıtken abzal. Qurban aıt – otbasy qundylyǵyn arttyratyn mereke. Ata-anamyzǵa, bala-shaǵamyzǵa syılyq berip, olarǵa arnaıy kóńil bólip, barynsha qýantaıyq. Mundaıda óskeleń urpaq Qurban aıttyń qadiri men saýabyn sezinip, izgilikke umtylady, merekeni asyǵa kútedi. Qoja Ahmet Iasaýı babamyz bir danalyq sózinde Haqqa qyzmet halyqqa qyzmet etýden bastalatynyn aıtqan. Bul – halyqtyń razylyǵy – Haqtyń razylyǵynda degen sóz. Osy rette elimizdegi barsha sharýa qojalyqtarynyń qojaıyndaryn mal qunyn qoldan kótermeı, halyqqa ońtaıly baǵany usynýǵa shaqyramyn.
Sonymen qatar, barsha kásipkerlerdi turǵyndar kúnde tutynatyn áleýmettik mańyzy bar azyq-túlik baǵasyna múmkindiginshe jeńildik jasaýǵa úndeımin. Allanyń raqym nury tógiletin Qurban aıtta jurtymyzǵa jaqsylyq jasap, kópshiliktiń alǵysyn alaıyq, aǵaıyn! Alla Taǵala shalǵan qurbandyǵymyzdy, bergen sadaqamyzdy qabyl etip, eki dúnıe nyǵmetine bólegeı! Áýmın!", - dedi Naýryzbaı qajy Taǵanuly.