Dúnıejúzilik qorshaǵan ortany qorǵaý kúni aıasynda Naýryzbaı aýdany «Tastybulaq» shaǵynaýdany aýmaǵyndaǵy saıabaqta «Altyn adam» tarıhı-etnografıalyq qolónerdi damytý respýblıkalyq qoǵamdyq birlestiginiń uıytqy bolýymen ekologtar men antıadrolyq qozǵalys belsendileri bas qosyp, jıylǵan qaýymǵa elimizdiń bolashaǵymen baılanysty ekologıalyq ahýal jaıynda sóz qozǵap, tabıǵatty, aınala ortany qorǵaýdyń mán-mańyzy jaıly tushshymdy áńgimesin aıtty.
Maqsat – ekologtardyń, qoǵam belsendileriniń basyn qosyp, aınala-ortamyzdyń tazalyǵyn retteý arqyly tarıhı-mádenı qundylyqtarymyzdy saqtaýǵa shaqyrý. Álbette, mundaı tálim balabaqtan bastaý alyp, mektepte jalǵasyp, otbasynan óristeıtini málim. Basqosýǵa kelip, ekologıalyq ahýaldyń túp-tamyrynan bastap áńgimeniń ashyǵyn aıtqandar sapynda «Nevada-Semeı» halyqaralyq antıadrolyq qozǵalysynyń ardageri Maıdan Ábishev, «Tabıǵat» ekologıalyq qoǵalysynyń tóraǵasy Mels Eleýsizov bastaǵan ekologtar, BAQ ókilderi, qoǵam belsendileri boldy.
Sonaý toqsanynshy jyldary «Altyn adam» qoǵamdyq birlestigi álemge áıgili, elimizdegi ıadrolyq oshaqty birjola japqan «Nevada-Semeı» halyqaralyq antıadrolyq qozǵalysynyń áserimen dúnıege kelgen qoǵamdyq uıym bolatyn. Birlestiktiń kózdegeni – rýhanı jańǵyrýdan bastaý alatyn tarıhı qundylyqty aıalap, qasterlep saqtaý. Sebebi, bul ótkenimizge, baba-dástúrge degen adaldyǵymyzdy bildiredi. Bul ózi jan tazalyǵynan bastaý alyp, jastardyń dúnıetanymyn jetildirip, ekologıalyq belsendiligin artyrady.
Kúni keshegi «Qańtar qyrǵyny» kezinde Táýelsizdiktiń tal-besigi sanalǵan Almatynyń qaq ortasynda turǵan elimizdiń basty sımvoly – «Altyn adam» monýmenti mańyndaǵy qorshaý, jıektastardyń búlingenin kórdik. Qalamyzda qanshama ǵımarat qırap, astan-kesten boldy.
Osyndaı óreskeldik neden shyǵady? Atalǵan qyrǵynnyń saıası astary – óz aldyna, áýleki toptyń, jastardyń aınala-orta qadirin túsinbeýinen, bolǵany anyq. Jastarymyz jan-táni tazalyqqa qumar, rýhanı erik-jigeri myqty, otanshyl bolýy kerek. Elimizdi órkendetýge úles qosatyn jastar tarıh qundylyǵyn boıǵa sińirýi qajet.
«Ejelgi tarıhı qundylyqtyń alǵy sapynda «Altyn adamnyń» turǵany anyq. Bir kezde tap osy biz turǵan Aqsaı ózeniniń mańynda saq qorǵandary bolǵanyn arheolog ǵalymdar dáleldegen. Ony saqtaı almaı, «ah» urǵanymyz ras. Áli de bolsa, osy Almatyǵa keıinnen qosylǵan aýmaqtarda kútimsiz qalǵan saq qorǵandary baryn bilemiz. Endi ǵana bılik tarapynan nazarǵa alyna bastaǵandaı. Qoǵamdyq birlestiktiń maqsaty – osyǵan qoǵam nazaryn aýdarý, bıliktiń kózin jetkizý. Eń bolmaǵanda, sol qalǵan qorǵandardy kútip, saqtaýǵa mindettimiz», – deıdi «Altyn adam» tarıhı-etnografıalyq qolónerdi damytý respýblıkalyq qoǵamdyq birlestiginiń teń tóraǵasy Serik Qazaqpaev.