Kóne jádiger meshitke tapsyrylady
Qarqaralydaǵy Qunanbaı qajy meshitiniń alǵashqy aıshyǵy tabyldy, dep habarlaıdy Almaty-akshamy.kz
1930 jyldary qyzyl úkimettiń jendetteri meshitti qıratý kerek degen buıryq shyǵaryp, Imash esimdi kisi aıshyǵyn myltyqpen atyp túsirgen eken. Biraq ol sol jerde jantásilim etken deıdi. Bul sumdyqqa kýá bolǵan jurt jan-jaqqa qasha jónelgende, Sádýaqas Sháripqajyuly jerge qulaǵan aıshyqty alyp úlgiredi. Sodan beri Sádýaqas molda bul jádigerdi kóziniń qarashyǵyndaı saqtap, ómiriniń sońyna deıin jastyǵynyń astynda jasyryp kelgen.
Belgili ólketanýshy Erlan Mustafın kóne jádigerdi - dál sol aıshyqty sońǵy ret alǵan aqsaqaldyń úıinen tapqan. Ol kezde qarıa qaıtys bolyp, balalary kerek qylmapty. Aıshyq Qytaıǵa jóneltkeli jatqan temir-tersektiń arasynda jatypty. Jalpy, tarıhı derekterge súıensek, bul meshit ótken ǵasyrdyń ortasynda jataqhana, pıonerler úıi, qoıma bolǵan. Tipti, 80-shi jyldary atqoraǵa aınala jazdapty. Keıin Táýelsizdik alǵan jyldary qaıta túledi.
«Qarqaraly ýezinde aǵa sultan bolyp basqaryp turǵan kezinde, Qunanbaı 12 bolystyń basyn qosyp osy meshitti salǵyzypty. Bul endi ol kisiniń óz zamanynda jáı ǵana shynjyr balaq, shubar tós, alpaýyt baı bolyp qana qoımaı, halyqtyń rýhanı álemine de qatty kóńil bólgendigin baıqatady dep aıtar edik. Qunanbaıdyń qolynda bolǵan qundy jádiger tarıhı buıym bolyp eseptelip otyr. Búgin sony qolymyzǵa ustap kórip, táý etip turǵan jaıymyz bar», - deıdi Qazaqstan Jazýshylar odaǵynyń tóraǵasy Ulyqbek Esdáýlet.
Kóne jádiger ázirge ólketanýshy Erlan Mustafınniń qolynda. Keleshekte ol aıshyqty meshitke tapsyrýdy kózdep otyr.