Abaı atyndaǵy Qazaq ulttyq pedagogıkalyq ýnıversıteti QS Quacquarelli Symonds jahandyq joǵary bilim taldaý agenttigi jarıalaǵan «QS World University Rankings – 2026» reıtıńinde álemniń eń úzdik ýnıversıtetteriniń qatarynan tabyldy. Al Ortalyq Azıa men Qazaqstannyń ishinen eń úzdik pedagogıkalyq ýnıversıtetterdiń kóshin bastap tur.
Búgin halyqaralyq «QS World University Rankings – 2026» reıtıńine qatysýshy joǵary oqý oryndaryna sertıfıkattar men marapattardy tabystaý rásimi ótti. Jańa reıtıńte Abaı ýnıversıteti 628-oryndy ıelenip, ótken jylmen salystyrǵanda birden 43 pozısıaǵa joǵary kóterildi (671–680 aralyǵy). Osylaısha, ýnıversıtet álemniń úzdik 650 joǵary oqý ornynyń qataryna kirip, Qazaqstannyń aldyńǵy qatarly úzdik 4 ýnıversıtetiniń biri retinde óz ornyn nyǵaıtty. Sonymen qatar, QazUPÝ –Qazaqstan men Ortalyq Azıadaǵy pedagogıkalyq bilim berý salasynyń kóshbasshysyna aınaldy.
Atalǵan marapatty Abaı atyndaǵy QazUPÝ Basqarma Tóraǵasy-Rektory Bolat Tilep qabyldap, ýnıversıtettiń jahandyq bilim keńistiginde joǵary baǵalanatynyn jetkizdi. Bul reıtıńtiń bilim berý sapasyn álemdik standarttar deńgeıinde jetildirýge, joǵary bilim berý úderisterin halyqaralyq tájirıbemen úılestirýge jáne jahandyq trendterdi baqylaýǵa múmkindik beretinin erekshe atap ótti.
– Bul jaı ǵana joǵary baǵa emes, bul – Abaı ýnıversıtetiniń halyqaralyq arenadaǵy jáne jahandyq akademıalyq qaýymdastyqtaǵy jetekshi deńgeıde moıyndalýy. Ýnıversıtettiń oqytý sapasyn, halyqaralyq áriptestigin, ınfraqurylymy men ınklúzıvti joǵary deńgeıin dáleldeıtin mańyzdy jetistik. Sonymen qatar, ýnıversıtettiń jahandyq básekege qabilettiligin arttyrýǵa baǵyttalǵan búkil ujymnyń júıeli dekúndelikti eńbeginiń nátıjesi. Ýnıversıtet ujymyn shyn júrekten quttyqtaı otyryp, jańa jetistikter tileımin, – deıdi Bolat Anapıauly.
Marapattaý sharasynda elimizdiń ózge de úzdik dep tanylǵan 20 joǵary oqý ornyna sertıfıkat pen arnaıy belgi berildi. Aıta keteıik, «QS World University Ranking» sertıfıkattaryn QS kompanıasynyń bas komersıalyq dırektory Djeıson Núman men QS Quacquarelli Symonds halyqaralyq reıtıń agenttiginiń óńirlik dırektory Sergeı Hrıstolúbov saltanatty túrdebúgin tabys etti.
Abaı atyndaǵy QazUPÝ
Baspasóz qyzmeti