Almatyda ulandyqtar áıgili Panfılov dıvızıasynyń sońǵy jaýyngerleriniń biri, Uly Otan soǵysynyń ardageri Qaıyrly Jonqabaev pen «Ońtústik» óńirlik qolbasshylyǵynyń Almaty qalasy boıynsha tyl ardageri Ǵalymjan Bakıshevtiń úıiniń aýlasynda saltanatty shara uıymdastyryp, kele jatqan Jeńis kúni merekesimen quttyqtady, dep habarlaıdy Almaty-akshamy.kz.
«Búgingi urpaq qazirgi táýelsiz Qazaqstan elinde, ashyq aspan astynda alańsyz, beıbit ómir keshýde. Osyndaı erkindik baqytyn bizderge adamzat tarıhyndaǵy eń joıqyn soǵysta buǵanasy bekimeı qolyna qarý alyp, qasyq qany qalǵansha kúresken aǵa urpaq syılady. Sondyqtan bizdiń jarqyn keleshegimiz úshin ot pen oqtyń ortasynda bolǵan ardagerlerimizdi qalaı jáne qanshalyqty ardaqtasaq ta jarasymdy! Tynyshtyq kúzetindegi Ulttyq ulan jaýyngerleri atynan erlikterińizge bas ıip, raqmet aıtamyz», - dedi tárbıe jáne áleýmettik-quqyqtyq jumystar basqarmasynyń bastyǵy, podpolkovnık Arman Seıtov.
Maıdangerge «Ońtústik» óńirlik qolbasshylyǵynyń qolbasshysy, general-maıor Talapker Ámireevtiń atynan alǵys hat tabystaldy. Al óńirlik qolbasshylyqtyń ardagerler keńesiniń músheleri panfılovshy qart sarbaz ben tyl ardagerine arnaıy daıyndap kelgen syı-sıapattaryn berdi.
«Ákemiz bıyl 102 jasqa tolady. Ulttyq ulannyń jyl saıyn kelip, atamyzǵa qurmet kórsetip júrgen «Ońtústik» óńirlik qolbasshylyǵyna alǵys aıtamyz. Búgin de kelip, merekelik kóńil-kúı syılap jatyrsyzdar. Ákemiz Jeńis ánderin tyńdap, erekshe marqaıyp qaldy», - deıdi Qaıyrly Jonqabaevtyń uly Erkin aǵa.
Ardagerlerdiń úıiniń aýlasynda Keńes Odaǵynyń batyry, gvardıa polkovnıgi Baýyrjan Momyshuly atyndaǵy 5571 áskerı bóliminiń orkestri soǵys jyldaryndaǵy áskerı ánderdi oryndap, saltanatty marshpen júrip ótti.
Biz ardagerlerimiz ben tyl eńbekkerlerin árqashan qurmet tutamyz. Qazirgi álemdegi beıbit ómir – sizder ákelgen Uly Jeńistiń jemisi. Sondyqtan da ol – qasıetti Jeńis! Ortamyzda ańyz-dastan bolyp, aman-esen júre berińizder, qurmetti ardagerler!