Májiliste qaralǵan zań jobasynda osyndaı másele kóterildi.
Qujattyń tolyq ataýy - «Qazaqstan Respýblıkasynyń keıbir zańnamalyq aktilerine ıtterdiń ulttyq tuqymdaryn saqtaý jáne ósimin molaıtý máseleleri boıynsha ózgerister men tolyqtyrýlar engizý týraly» zań jobasy.
Zań jobasy boıynsha jasalǵan qorytyndyny depýtattarǵa Parlament Májilisiniń Ekonomıkalyq reforma jáne óńirlik damý komıtetiniń múshesi Ámirhan Rahymjanov tanystyrdy, dep habarlaıdy Almaty-akshamy.kz QazAqparatqa silteme jasap.
Aıtýynsha, zań jobasy maquldansa, qazaqy tazy men tóbet tuqymyn saqtaý jáne ósimin molaıtýǵa jaýapty ýákiletti organ qurylady.
Ol uıymnyń qazirgi shartty ataýy - Qazaqy ıt tuqymdarynyń ulttyq ortalyǵy.
«Ortalyqtyń negizgi quzyretine biryńǵaı asyl tuqymdy qazaqy tazy men tóbettiń kitabyn júrgizý, atalǵan tuqymdardyń standarttaryn ázirleý jáne basqa da mindetter kiredi. Sonymen qatar, zań jobasy kınologıalyq qyzmet uǵymdaryn, qazaqy tuqymdy ıttiń shyǵý tegi týraly kýálikti, biryńǵaı asyl tuqymdy kitapty, qazaq ıt tuqymdary men ulttyq ańshylyq standartyn aıqyndaıdy», - dedi depýtat.
Memleket bul ortalyqty osy salada jumys isteıtin qoǵamdyq birlestikterge memlekettik áleýmettik tapsyrys arqyly qarjylandyryp, qoldaý kórsetpek.
«Sondaı-aq, zań jobasynda Qazaqstan Respýblıkasynyń ǵylymı uıymdary júzege asyratyn qazaq ıt tuqymdaryn saqtaý jáne ósimin molaıtý salasyndaǵy ǵylymı zertteýler jónindegi norma kózdelgen. Ǵylymı uıymdar ýákiletti organmen, ulttyq ortalyqpen, sondaı-aq kınologıalyq qyzmetti júzege asyratyn qoǵamdyq birlestiktermen birlesip, qazaqtyń ıt tuqymdaryn saqtaý jáne ósimin molaıtý salasynda memlekettik ǵylymı-tehnıkalyq baǵdarlamalar ázirleıdi. Zań jobasynyń normalaryn iske asyrý úshin 1,4 mlrd teńge qajet bolady. Bul soma 18 qazanda respýblıkalyq búdjet komısıasynyń otyrysynda qoldaý tapty», - dedi Ámirhan Rahymjanov.
Eske salsaq, tamyz aıynda qazaqy tazy men tóbetti saqtaý máselesin Prezıdenttiń İs Basqarmasy qolǵa alǵany habarlanǵan.