3 naýryzda Almatyda «Beıbitshilik pen jasampazdyq jolyndaǵy yntymaqtastyq: Qazaqstannyń BUU-nyń quramyna kirýiniń 33 jyldyǵy jáne BUU-nyń 80 jyldyǵy» atty ǵylymı-praktıkalyq konferensıa ótti. Konferensıa UN Plaza ǵımaratynda QR Syrtqy ister mınıstrligi men BUU-nyń Qazaqstan Respýblıkasyndaǵy Turaqty ókildig uıymdastyrdy.
2025 jyly BUU-nyń 80 jyldyq mereıtoıy álem boıynsha atap ótilýde. 1945 jyly qurylǵan jahandyq uıym álemde beıbitshilik pen qaýipsizdikti saqtaýdy maqsat etedi. Ony qurýdaǵy basty maqsat soǵystyń aldyn alý.
Sonymen qatar bıyl 2 naýryzda Qazaqstannyń BUU-ǵa múshe bolǵanyna 33 jyl toldy. Soǵan oraı Almaty tórinde álemniń túrli eliniń dıplomattary, elshileri bas qosqan alqaly jıyn uıymdastyryldy.
Ǵylymı-praktıkalyq konferensıany BUU-nyń Qazaqstandaǵy jahandyq komýnıkasıalar Departamentiniń ókili Vlastımıl Samek júrgizdi. Ol óz sózi barysynda BUU-nyń 80 jyldyq mereıtoıymen jáne Qazaqstannyń uıymǵa múshe atanýynyń 33 jyldyǵymen quttyqtady. Ol Qazaqstannyń álemdik qaýipsizdik pen beıbitshilikke úlesi orasan zor ekenin atap ótti.
Onymen birge ústeldiń tórinde elimizdiń burynǵy syrtqy ister mınıstri, BUU janyndaǵy Qazaqstannyń alǵashqy Turaqty ókili Aqmaral Arystanbekova jáne Qazaqstannyń Almaty qalasyndaǵy SİM ókili Jánibek Abdrashov otyrdy. A. Arystanbekova óz sózinde elimizdiń halyqaralyq qaýymdastyqqa múshe bolǵan alǵashqy jyldardy eske aldy. Sonymen qatar elimizdiń beıbitshilik pen qaýipsizdikke qosqan úlesi jaıly baıandama jasady.
Budan bólek sóz sóılegenderdiń ishinde QHR-dyń Almatydaǵy Bas konsýly Szán Veı, Fransıanyń Bas konsýly Fabrıs Neve, RF Bas konsýly Dmıtrıı Týraev boldy. Olar Almatyda Ortalyq Azıa men Aýǵanstan úshin BUU Óńirlik ortalyǵyn qurý jónindegi bastamany qoldaıtynyn aıtty. Mundaı bastamany memleket basshysy Qasym-Jomart Toqaev usynǵanyn aıta ketken jón.