«Ǵylymı-pedagogıkalyq vıza» berýdiń ońaılatylǵan tártibi engiziledi.
Qazaqstandy óńirlik bilim berý habyna aınaldyrý úshin shetelden 100 oqytýshy men ǵalym shaqyrylady. Bul týraly QR Eńbek jáne halyqty áleýmettik qorǵaý mınıstrligi kóshi-qon komıteti tóraǵasynyń mindetin atqarýshy İlıas Ispanov aıtty, dep habarlaıdy Almaty-akshamy.kz QazAqparatqa silteme jasap.
Spıkerdiń aıtýynsha, Eńbek mınıstrligi basqa da quziretti memlekettik organdarmen birlesip, 2023-2027 jyldarǵa arnalǵan Kóshi-qon saıasaty tujyrymdamasyn ázirlegen.
Ony 30 qarashada Úkimet qaýlysymen bekitti.
«Jańa tujyrymdama elimizdiń kóshi-qon salasyn retteýge jáne ekonomıka damýyn kadrlyq jaǵynan qamtamasyz etýdi kózdeıdi. Onyń aıasynda aldaǵy jumys barysy 3 bloktan turady, birinshi – elimizge bilikti kadrlardy kelýin yntalandyrý, ekinshi – shetelge shyqqan bizdiń azamattardyń jumysyn retteý nemese eńbek quqyqtaryn qorǵaýǵa baǵyttalǵan jumystar, úshinshi – óńirler arasyndaǵy demgorafıalyq teńsizdikti joıýǵa arnalǵan jumystar bolady», - dedi İlıas Ispanov Ortalyq komýnıkasıalar qyzmetinde ótken baspasóz máslıhatynda.
Elimizge eń tapshy mamandyqtar boıynsha 500 myqty mamandy tartý úshin 7 baǵytta jumys júrgiziledi.
Birinshi baǵyt – Qazaqstandy óńirlik bilim berý habyna aınaldyrýdy kózdeıtin bilim ımıgrasıasy.
«Bul baǵyttaǵy jumys joǵary oqý oryndarynyń profesor-oqytýshylar quramyn kúsheıtýge jáne bilim berý sapasyn arttyrýǵa arnalǵan. Ol úshin 100 úzdik oqytýshy men suranysqa ıe tehnologıalar boıynsha ǵalymdardy Qazaqstanǵa tartý usynylady. Bul maqsatta 10 jyldyq «Ǵylymı-pedagogıkalyq vıza» berýdiń ońaılatylǵan tártibi engiziledi. Sonyń negizinde Qazaqstanda turaqty turýǵa yqtıarhat, keıinnen azamattyq alý múmkindikteri qarastyrylady. Dál osyndaı múmkindikti tapshy mamandyqtar boıynsha oqıtyn sheteldik stýdentter arasynan magıstranttar men bakalavrlarǵa da berý qaralady», - dep túsindirdi İ. Ispanov.
Sonymen birge, ınvestısıalyq vıza berýdiń tómengi shegin 300 myń AQSH dollaryna (shamamen 140 mln teńge) deıin azaıtý qarastyrylǵan.
Osy sanattaǵy mıgranttar úshin «Investorlyq vıza» engizý usynylady.
Bul vıza elde turýǵa, bıznesin tirkeýge, múlikke ıelik etýge, jumysker jaldaýǵa, qarjy tólemderin jasaýǵa jáne olardyń kásipkerlik qyzmetinen týyndaıtyn ózge de operasıalar júrgizýge tolyq múmkindik beredi.